الیاس عشقی کی منتخب غزلیں اور نظمیں۔
وقت وقت کی بات ہے یا دستور ہے دنیا کا سائیں (غزل)
وقت وقت کی بات ہے یا دستور ہے دنیا کا سائیں
دن ڈھلتے ہی بڑھ جاتا ہے قد سے خود سایا سائیں
ڈھونڈنے والے پا لیتی ہیں انت سمندر کا سائیں
تھاہ ملی نہیں جس کی کسی کو دل ہے وہ دریا سائیں
منزل عشق میں ایسے ایسے ہوش ربا کچھ موڑ ملے
راہ دکھانے والے گھر کا بھول گئے رستا سائیں
عشق کے طوفانی دریا میں جو ڈوبا وہ پار گیا
کچے گھڑے نے بیچ بھنور میں کس کا ساتھ دیا سائیں
یہ داتا کی دین ہے بادل گھر کے سمندر پر برسا
اور کنارے پیاسا کوئی قطرے کو ترسا سائیں
جو طوفان آیا تھا اس کے اب کوئی آثار نہیں
قلزم درد میں دل کا سفینہ کب کا ڈوب گیا سائیں
کان میں میرے چپکے چپکے کون یہ کہتا ہے عشقیؔ
ہر دن دنیا وہی پرانی ہر شب خواب نیا سائیں
عشقیؔ صاحب لکھنا ہے تو کوئی نئی تحریر لکھو (غزل)
عشقیؔ صاحب لکھنا ہے تو کوئی نئی تحریر لکھو
اب تک تم نے خواب لکھے اب خوابوں کی تعبیر لکھو
اس الجھن کو سلجھانے کی کون سی ہے تدبیر لکھو
عشق اگر ہے جرم تو مجرم رانجھا ہے یا ہیر لکھو
جہاں بھی قصر شیریں دیکھو خسروؔ کی جاگیر لکھو
کوہ جہاں حائل ہوا اس پر خوں سے جوئے شیر لکھو
دشت سے آزادی کی ہوائیں ان کو بلانے آتی ہیں
اہل جنوں کو روکنے والی کون سی ہے زنجیر لکھو
شہر سخن کے عزت دارو کچھ تو کسی کا پاس کرو
کوئی تو ہوگا جس کو آخر تم صاحب توقیر لکھو
ہم وطنوں کے درد کا درماں ایسا کچھ دشوار نہیں
نام وطن ہے اسم اعظم خاک وطن اکسیر لکھو
اپنی کمندیں پھینک کے جس کو قید کیا ہے ظلمت نے
وہ سورج کب ابھرے گا کب پھیلے گی تنویر لکھو
اپنے عہد کی سفاکی پر یہ خاموشی طنز نہیں
کوئی تو ہوگا اس کا سبب کیوں بیٹھے ہو دلگیر لکھو
جب تک سر سے خوں نہ بہے گا کوہ کنی ہے خام خیال
تیشے کو خلاق کہو یا پتھر کو تصویر لکھو
ڈھا دے جو انسان کے دل میں رنگ و نسل کی دیواریں
کوئی تو دستور محبت ایسا عالم گیر لکھو
ہر ہر دور کے لکھنے والے حاشیے اس کے لکھتے ہیں
اپنے عہد میں نسخۂ دل کی تم بھی کوئی تفسیر لکھو
حرف کی طاقت بے پایاں ہے حرف کے ہیں امکان بہت
حرف کو زندہ کرنا سیکھو پھر چاہے تقدیر لکھو
دل پر جس کے نقش نہ ابھریں وہ کیا ابرو کیسی نظر
کتنا ہی تم تیر نظر کو ابرو کو شمشیر لکھو
روشن کیسے ہوگا سواد حرف جو خون دل نہ جلا
چربہ تم غالبؔ کا اتارو چاہے برنگ میرؔ لکھو
اپنے دکھڑے لکھ لکھ کر دیوان تو تم نے جمع کیا
دل کو جو بدلے اب کوئی ایسا شعر پر تاثیر لکھو
تری خاموش محبت کو نہ سمجھا کوئی (نظم)
تری خاموش محبت کو نہ سمجھا کوئی
بے زبانی تری اظہار بنی تھی جس کا
ترے جذبات ترے احساسات
کبھی شادابی سے تیری کبھی کملاہٹ سے
آشکارا تھے مگر کوئی نہ سمجھا تری بات
زندگی بھی تری پوشیدہ تھی انسانوں سے
پھر بھی کچھ لوگوں نے دولت کے لئے نال سمجھ کر تجھ سے
ڈرائنگ روم اپنے سجا رکھے ہیں
مرتبانوں میں توجہ سے لگایا ہے تجھے
کتنی یک طرفہ رہی ہے تری چاہ
لیکن اس دور میں کچھ لوگ زباں داں ہیں ترے
مل گیا ہے تری خاموش محبت کو جواب
دیر ہی سے سہی انسان کا دل جاگا ہے
آج بھی رنج میں راحت میں ہے تو اس کی شریک
اس کا غم رکھتا ہے افسردہ تجھے
اور خوشیاں تجھے سرسبز بنا دیتی ہیں
لیکن اب بھی بہت ایسے ہیں نہیں جن کو خبر
ان پہ جو بیتتی ہے تجھ پہ گزر جاتی ہے
راس بے مہری انساں تجھے کب آتی ہے
رنج کی آنچ سے تو سوکھ کے رہ جاتی ہے