عابد ادیب کی منتخب غزلیں اور نظمیں۔
سفر میں ایسے کئی مرحلے بھی آتے ہیں (غزل)
سفر میں ایسے کئی مرحلے بھی آتے ہیں
ہر ایک موڑ پہ کچھ لوگ چھوٹ جاتے ہیں
یہ جان کر بھی کہ پتھر ہر ایک ہاتھ میں ہے
جیالے لوگ ہیں شیشوں کے گھر بناتے ہیں
جو رہنے والے ہیں لوگ ان کو گھر نہیں دیتے
جو رہنے والا نہیں اس کے گھر بناتے ہیں
جنہیں یہ فکر نہیں سر رہے رہے نہ رہے
وہ سچ ہی کہتے ہیں جب بولنے پہ آتے ہیں
کبھی جو بات کہی تھی ترے تعلق سے
اب اس کے بھی کئی مطلب نکالے جاتے ہیں
میں اپنے جسم میں کچھ اس طرح سے بکھرا ہوں (غزل)
میں اپنے جسم میں کچھ اس طرح سے بکھرا ہوں
کہ یہ بھی کہہ نہیں سکتا میں کون ہوں کیا ہوں
انہیں خوشی ہے اسی بات سے کہ زندہ ہوں
میں ان کی دائیں ہتھیلی کی ایک ریکھا ہوں
میں پی گیا ہوں کئی آنسوؤں کے سیل رواں
میں اپنے دل کو سمندر بنائے بیٹھا ہوں
وہ میرے دوست جو ایک ایک کر کے دور ہوئے
میں ان کو آج بھی اپنے قریب پاتا ہوں
محیط کرنے کی کوشش فضول ہے مجھ کو
ندی کا چھور نہیں ہوں میں بہتا دریا ہوں
مجھی پہ پھینکے ہے پتھر جو کوئی آتا ہے
کہ جیسے میں تری کھڑکی کا کوئی شیشہ ہوں
پھر مجھے ایسا لگا (نظم)
پھر مجھے ایسا لگا
جیسے کاغذ پر سیاہی پھیلنے سے
لفظ گڈمڈ ہو گئے ہوں
آئنہ دھندلا گیا ہو
جانے پہچانے ہوئے سب لوگ
جیسے اجنبی سے بن گئے ہوں
میرے کمرے میں پڑی
ٹیبل کے خانوں سے نکل کر
خط ہوا میں اڑ رہے ہوں
باکس میں رکھا ہوا رومال
شعلہ بن گیا ہو
برف کے تودوں تلے دب کر ذہن بھی
منجمد ہونے کے بدلے جل رہا ہو
جیسے میں اپنے سے باغی ہو گیا ہوں
اپنے ہی اوپر میں حملہ کر رہا ہوں
سوچتا ہوں
میں نے شاید کل تجھے کچھ کہہ دیا تھا
تو نے بھی مجھ کو سنایا تھا بہت کچھ
اور پھر دونوں ہی ہم چپ ہو گئے تھے