حامد حسن قادری کی غزلیں — Hamid Hasan Qadri Ghazals

حامد حسن قادری کی منتخب غزلیں اور نظمیں۔

ہوتی رہتی ہے خلش درد کی اکثر دل میں (غزل)

ہوتی رہتی ہے خلش درد کی اکثر دل میں

رہ گیا ہو نہ کہیں ٹوٹ کے نشتر دل میں

آتا رہتا ہے تصور تری مست آنکھوں کا

چلتے رہتے ہیں مئے ناب کے ساغر دل میں

خواب میں خوب لیے ہم نے تصور کے مزے

آج مہمان رہا ہے کوئی شب بھر دل میں

جو مزا تیری جفا میں ہے کسی شے میں نہیں

گھر بنا لیتے ہیں یہ خنجر و نشتر دل میں

کبھی ہنستا ہوں تری دھن میں کبھی روتا ہوں

یاس رہتی ہے تمنا کے برابر دل میں

غم نہیں شوق نہیں درد نہیں کچھ بھی نہیں

جھوٹ گر جانتے ہو دیکھ لو آ کر دل میں

تو سہی آگ لگا دوں میں قیامت کر دوں

دل جلے رکھتے ہیں سرمایۂ محشر دل میں

اب کھلا راز قریب رگ جاں کا عقدہ

جس کو ہم ڈھونڈتے پھرتے ہیں وہ ہے ہر دل میں

یہ بڑا حسن ہے تصویر میں اس کی حامدؔ

گھر بنا لیتی ہے آنکھوں سے اتر کر دل میں

تجھے حسن نے کیا سے کیا کر دیا (غزل)

تجھے حسن نے کیا سے کیا کر دیا

ادھر دیکھ او بت خدا کر دیا

طبیعت میں پیدا مزہ کر دیا

محبت نے درد آشنا کر دیا

بہت دوستی جن سے گاڑھی چھنی

انہیں نے مزہ کرکرا کر دیا

میں قربان اے ناامیدی ترے

مرے دل کو بے مدعا کر دیا

دم نزع آئے یہ کہہ کر چلے

جو وعدہ کیا تھا وفا کر دیا

ادھر آ گلے سے لگا لوں تجھے

مری جان کس نے خفا کر دیا

صبا لا کے تو نے در یار پر

مری خاک کو کیمیا کر دیا

الٰہی سزا ہے یہ کس جرم کی

کہ اس پر مجھے مبتلا کر دیا

بہت مرنے جینے کے جھگڑے رہے

ترے تیر نے فیصلہ کر دیا

ملا آج حامدؔ عجب حال تھا

اسے عشق نے کیا سے کیا کر دیا

آہ اے شبنم کے قطرے تیری حالت دیکھ کر (نظم)

آہ اے شبنم کے قطرے تیری حالت دیکھ کر

پانی ہو ہو کر بہے جاتے ہیں میرے دل جگر

عمر کم کو ساتھ اے نادان کیوں لایا ہے تو

ایک شب کے واسطے دنیا میں کیا آیا ہے تو

ہائے مل جائیں گے سب ارمان تیرے خاک میں

صبح اب نزدیک ہے سورج ہے تیری تاک میں

بے ثباتی اور پھر ایسی ہزار افسوس ہے

زندگیٔ مختصر پر لاکھ بار افسوس ہے

دیکھ کر تجھ کو نکل آئے یہ آنسو کس لیے

چل گیا دل پر ہمارے تیرا جادو کس لیے

آب داری میں ہے بڑھ چڑھ کر در غلطاں سے تو

کیا مشابہ ہے کسی کے گوہر دنداں سے تو

یا پسینہ ہے کسی معشوق کے رخسار کا

یا کوئی قطرہ ہے دود آہ آتش بار کا

تجھ میں یہ دل بستگی آئی کہاں سے کیا ہے تو

باغ میں جا کر جو دیکھو حسن کا دریا ہے تو

گود میں لیتے ہیں تجھ کو جان تو پھولوں کی ہے

تیرے دم سے تیرے باعث آبرو پھولوں کی ہے

زرد پتا ہو گیا تھا روئے پر انوار گل

شرم رکھ لی تو نے بن کر غازۂ رخسار گل

لیلئ شب باغ میں آتی ہے دن کو ٹال کر

موتیوں کا تیرے ہار اپنے گلے میں ڈال کر

پھول پتے سبزۂ خوابیدہ کی تو جان ہے

آب داری تجھ پہ صدقے تازگی قربان ہے

پلتی ہے ہر اک کلی تیری بغل میں رات بھر

رہتی بستی ہے ترے موتی محل میں رات بھر

الغرض بالیدگی پودوں کی تیرا کام ہے

چشمۂ آب خضر تیری تری کا نام ہے

ساری رونق گلشن عالم کی تیرے دم سے ہے

تازگئ سبزہ و گل قطرۂ شبنم سے ہے