حامد عظیم آبادی کی منتخب غزلیں اور نظمیں۔
وفا کرنے آئے جفا کر چلے (غزل)
وفا کرنے آئے جفا کر چلے
ہمیں خاک میں وہ ملا کر چلے
یہ کیا تم کو سوجھی یہ کیا کر چلے
کہ چتون سے بسمل بنا کر چلے
مجھے قتل تیغ جفا کر چلے
یہ کیا کر چلے تم یہ کیا کر چلے
ملائی کبھی تم نے جس سے نگاہ
اسے اپنا شیدا بنا کر چلے
تری راہ میں مثل نقش قدم
ہم اپنے کو کیا کیا مٹا کر چلے
ادھر آؤ بیٹھو بھی آغوش میں
کہاں مجھ سے آنکھیں چرا کر چلے
تمہیں پاس اگر بیٹھنا ہی نہ تھا
تو کیوں ہم سے تم دل لگا کر چلے
زباں پر نہ لانا تھا حرف گلہ
تری بزم سے منہ کی کھا کر چلے
ازل کا تمہیں قول ہے یاد بھی
کہ آئے تھے کیا کہہ کے کیا کر چلے
اٹھا کر ہمیں تو نے رسوا کیا
سزا دل لگانے کی پا کر چلے
مٹے سیکڑوں کوچۂ عشق میں
نہ کمبخت دل سر اٹھا کر چلے
وہ بیٹھے تو بیٹھے مرے دل پہ تیر
چلے تو قیامت بپا کر چلے
مجھے روتے میں آ کے بعد فنا
وہ میت پر آنسو بہا کر چلے
وہ ٹھکرا گئے میری تربت کو کیا
کہ فتنے ہزاروں جگا کر چلے
ہوا ان کے آگے جو حامدؔ کا ذکر
تو کس ناز سے مسکرا کر چلے
حسن کی وقعت نہیں اب عشق کی سرکار میں (غزل)
حسن کی وقعت نہیں اب عشق کی سرکار میں
بک گئے یوسف ہزاروں مصر کے بازار میں
جو نہ کرنا تھا وہ راز عشق ظاہر کر دیا
آ کے رسوا ہو گئے ہم مجمع اغیار میں
اور سے کیا پوچھتے ہیں آ کے ہم سے پوچھئے
کیا مزہ ملتا ہے دل کو آپ کی گفتار میں
خواب سے بیدار ہوتے ہی نہیں ہیں بادہ خوار
ایسی مستی ہے ہوائے صبح کی رفتار میں
عشق لیلیٰ میں یہ دیکھا حال ہم نے قیس کا
خاک چھانا ہی کیا وہ کوچہ و بازار میں
اے مسیحا کس طرح حاضر ہو تیرے سامنے
اب سکت اٹھنے کی بھی باقی نہیں بیمار میں
آفت ارض سماوی سے بچے گا اپنا گھر
اسم اعظم جب ہے شامل ہر در و دیوار میں
دشمنوں کا دوست بن جاتا ہے کچھ دن کے لئے
عیب ہوتا ہے یہ اکثر مرد کج رفتار میں
کر نہیں سکتے ہیں آپس میں وہ باتیں ہوش کی
بے خودی کا یہ اثر ہے مے کش و مے خوار میں
بے خبر وہ ہے تو ہے یہ باخبر ہر گام سے
فرق ہے اے دل بہت لایعقل و ہشیار میں
دشت و گلشن میں نہیں حامدؔ کوئی دل بستگی
جی بہلتا ہے اگر اپنا تو کوئے یار میں