حنا رضوی کی منتخب غزلیں اور نظمیں۔
کون کہتا ہے کے ہر شخص فرشتہ ہو جائے (غزل)
کون کہتا ہے کے ہر شخص فرشتہ ہو جائے
آدمی تھوڑا تو انسان کے جیسا ہو جائے
کتنا معصوم نظر آتا تھا بچپن میں مرے
آئنے میں مرا پھر سے وہی چہرہ ہو جائے
پھر بلا کوئی میرے پاس سے گزرے کیسے
جب دعا ماں کی مرے سر کا دوپٹہ ہو جائے
آندھیوں کو یہ گماں ہے کہ بجھا دیں گی چراغ
اور چراغوں کو یہ ضد ہے کہ اجالا ہو جائے
ٹوٹ سکتا ہے کسی پل بھی سمندر کا غرور
منہ اگر موڑ لیں دریا تو یہ پیاسا ہو جائے
جوڑنا آتا ہے ٹوٹے ہوئے شیشوں کو مجھے
بس جو بال آئے دعا یہ ہے کہ دھندلا ہو جائے
بد دعا کب تھی مگر ہاں مجھے آیا تھا خیال
عشق جس سے ہے اسے وہ بھی کسی کا ہو جائے
کہیں پہ مال و دنیا کی خریداری کی باتیں ہیں (غزل)
کہیں پہ مال و دنیا کی خریداری کی باتیں ہیں
کہیں پہ دن بہ دن بڑھتی ریا کاری کی باتیں ہیں
بھرے بازار میں سچ کی دکانوں پر ہے سناٹا
تجارت جھوٹ کی چمکی ہے مکاری کی باتیں ہیں
کہیں روزے پہ روزے صرف پانی پی کے کھلتے ہیں
کہیں بس نام پہ روزوں کے افطاری کی باتیں ہیں
کہیں کھانا ہی کھانا ہے مگر پینے سے کب فرصت
کہیں پہ بھوک کی بستی میں بیماری کی باتیں ہیں
زمانے اور تھے وہ جن میں کچھ درویش ہوتے تھے
نئے اس دور میں ہر سمت بد کاری کی باتیں ہیں
وفا ایثار قربانی وہاں اب لوگ کیا جانیں
جہاں نیلام ہوتے ظرف و خود داری کی باتیں ہیں
کبھی مذہب تھا دل میں اب ہے دولت کی پناہوں میں
خدا کا نام لے کر بھی گنہ گاری کی باتیں ہیں
کسی کے زخم پہ مرہم حناؔ رکھتا نہیں کوئی
نمک لہجوں نے گھولا قلب آزاری کی باتیں ہیں
بنت حوا ہوں میں عورت ہے مرا اسم شریف (نظم)
بنت حوا ہوں میں عورت ہے مرا اسم شریف
ہے یہ پہچان مری اور یہی ہے تعریف
مجھ کو ہے فخر کہ اس قوم سے نسبت ہے مری
فاطمہؓ مریم و سیتا سی ہیں رہبر جس کی
میں بھی اشرف ہوں نگاہوں میں خدا کی میرے
میری تو گود میں کھیلے ہیں مسیحا کتنے
کتنے ولیوں نے مرے ہاتھ کی روٹی کھائی
کتنے شاہوں نے مرے پاؤں میں جنت پائی
میں ہی پتھر کے مکانوں کو بناتی گھر ہوں
میں ہی دنیائے محبت کا حسیں محور ہوں
میرے اوصاف گنانے کو یہ کاغذ کم ہیں
صنف نازک ہوں مگر روح مری رستم ہے
میں نے جذبوں کا تصدق و بھرم رکھا ہے
میری ہی ذات سے منسوب ہر اک رشتہ ہے
ماں بہن ہوں کبھی بیوی تو کبھی بیٹی ہوں
کوئی کردار ہو مردوں سے وفا کرتی ہوں
ہاں مگر شرط وفا یہ ہے کہ پاؤں بھی وفا
میں بھی انسان ہوں کمتر نہیں رتبہ میرا
اور رشتوں سے الگ بھی ہے مری اک ہستی
جو فقط گھر میں ہی محدود نہیں رہ سکتی
غنچہ و گل سے بھی کب چاہیے تشبیہ مجھے
حسن سیرت سے مرے دیجیے ترجیح مجھے
میری زلفوں مرے کاجل کی نہ باتیں کریے
کچھ مرے ذوق و ذہانت کو بھی اچھا کہیے
حیثیت ہو نہیں سکتی نظر انداز مری
روک سکتا نہیں اب کوئی بھی پرواز مری
آسماں کیا ہے خلا تک ہے رسائی میری
عزم دے سکتا ہے خود بڑھ کے گواہی میری
اندرا ہوں میں ٹریسا ہوں ملالہ ہوں میں
جس نے دنیا کو جھکایا وہ ارادہ ہوں میں
میرا ہرگز نہیں کہنا مجھے برتر سمجھیں
مرد حضرات مجھے صرف برابر سمجھیں
میں چلوں شانہ بہ شانہ تو برا مت مانیں
میری حرمت میری عظمت کو ذرا پہچانیں
بنت حوا ہوں حناؔ بات بڑی ہے میری
نام عورت ہے مرا ذات بڑی ہے میری