دتا تریہ کیفی کی غزلیں — Dattatriya Kaifi Ghazals

دتا تریہ کیفی کی منتخب غزلیں اور نظمیں۔

اک خواب کا خیال ہے دنیا کہیں جسے (غزل)

اک خواب کا خیال ہے دنیا کہیں جسے

ہے اس میں اک طلسم تمنا کہیں جسے

اک شکل ہے تفنن طبع جمال کی

اس سے زیادہ کچھ نہیں دنیا کہیں جسے

خمیازہ ہے کرشمہ پرستئ دہر کا

اہل زمانہ عالم عقبیٰ کہیں جسے

اک اشک آرمیدۂ ضبط غم فراق

موج ہوائے شوق ہے دریا کہیں جسے

باوصف ضبط راز محبت ہے آشکار

عقدہ ہے دل کا عقد ثریا کہیں جسے

برہم زن حجاب ہے خود رفتگیٔ حسن

اک شان بے خودی ہے زلیخا کہیں جسے

عکس صفائے قلب کا جوہر ہے آئینہ

وارفتۂ جمال خود آرا کہیں جسے

رم شیوہ ہے صنم تو ہے رم آشنا یہ دل

حاصل ہے مجھ کو عیش مہیا کہیں جسے

خونی کفن یہ سینت کے رکھا ہے کس لیے

قاتل وہ ہے کہ رشک مسیحا کہیں جسے

سب کچھ ہے اور کچھ بھی نہیں دہر کا وجود

کیفیؔ یہ بات وہ ہے معما کہیں جسے

باعث کوئی ایسا ہے کہ میں کچھ نہیں کہتا (غزل)

باعث کوئی ایسا ہے کہ میں کچھ نہیں کہتا

ورنہ مجھے سودا ہے کہ میں کچھ نہیں کہتا

الزام یہ جھوٹا ہے کہ میں کچھ نہیں کہتا

کیا وہ مری سنتا ہے کہ میں کچھ نہیں کہتا

جھوٹا ترا کہنا ہے کہ میں کچھ نہیں کہتا

دعویٰ مرا سچا ہے کہ میں کچھ نہیں کہتا

تو دیکھ رہا ہے جو مرا حال ہے قاصد

مجھ کو یہی کہنا ہے کہ میں کچھ نہیں کہتا

کہنا جو نہ تھا کہہ گیا دیکھو تو ڈھٹائی

اور پھر کہے جاتا ہے کہ میں کچھ نہیں کہتا

وہ ضد پہ تلے بیٹھے ہیں کیا بحث سے حاصل

موقع ہی یہ ایسا ہے کہ میں کچھ نہیں کہتا

تھی سمع خراشی کی شکایت کبھی ان کو

اب سنتا ہوں شکوا ہے کہ میں کچھ نہیں کہتا

بد گوئی سی بد گوئی ہے بہتان سا بہتان

اور اس پہ وہ کہتا ہے کہ میں کچھ نہیں کہتا

میں کچھ کہوں تو ہاتھ وہ کانوں پہ ہیں دھرتے

اور الٹا یہ چھیڑا ہے کہ میں کچھ نہیں کہتا

آتا ہے جو منہ پر وہ کہے جاتے ہیں بے روک

اور اس پہ یہ فقرا ہے کہ میں کچھ نہیں کہتا

میں دیکھ چکا ہوں انہیں کہہ کہہ کے مگر کیا

اس کا ہی نتیجہ ہے کہ میں کچھ نہیں کہتا

میں کس سے کہوں کیا کہوں سنتا ہے وہاں کون

اس کا ہی یہ منشا ہے کہ میں کچھ نہیں کہتا

یہ ترک محبت نہیں ان سے مگر اے دوست

رنج ایسا ہی پہنچا ہے کہ میں کچھ نہیں کہتا

قینچی سی چلی چلتی ہے دیکھو تو زباں اور

اس پر بھی یہ دعویٰ ہے کہ میں کچھ نہیں کہتا

راز ان کے کھلے جاتے ہیں ایک ایک سبھوں پر

اور اس پہ تماشا ہے کہ میں کچھ نہیں کہتا

سچ بات کے سننے کی انہیں تاب کہاں ہے

اس سے یہی اچھا ہے کہ میں کچھ نہیں کہتا

باتیں ہیں کہ چھریاں سی چبھی جاتی ہیں دل میں

میرا ہی کلیجہ ہے کہ میں کچھ نہیں کہتا

میں کہنے پہ آؤں تو رلا کر انہیں چھوڑوں

مت پوچھ سبب کیا ہے کہ میں کچھ نہیں کہتا

چپ چاپ سنی ان سنی کر دیتا ہوں ہر بات

غیروں میں بھی چرچا ہے کہ میں کچھ نہیں کہتا

نازک ہے مزاج ان کا یہاں سچ کی ہے عادت

اس سمجھے سبب کیا ہے کہ میں کچھ نہیں کہتا

بگڑا ہے مزاج اور کہیں تیز نہ ہو جائیں

مجھ کو یہی سانسا ہے کہ میں کچھ نہیں کہتا

کیوں اپنی زباں سے کہوں پوچھو تم انہیں سے

راز اس میں نہیں یا ہے کہ میں کچھ نہیں کہتا

جو رنج عزیزوں نے دئے کیا کہوں کیفیؔ

غیرت کا تقاضا ہے کہ میں کچھ نہیں کہتا