علی مینائی کی منتخب غزلیں اور نظمیں۔
شب حیات میں قندیل آرزو ترا غم (غزل)
شب حیات میں قندیل آرزو ترا غم
سکوت جاں میں فروزاں صدائے ہو ترا غم
رم نفس میں مچلتی ہوئی صدا ترا نام
رگ گلو میں سلگتا ہوا لہو ترا غم
حریم ذات میں روشن چراغ کے مانند
ریاض شوق میں نخل سبک نمو ترا غم
مرے شعور کے زنداں میں اک دریچۂ نور
مرے وجود کے صحرا میں آب جو ترا غم
لگن کوئی بھی ہو عنوان جستجو ترا حسن
سخن کسی سے ہو موضوع گفتگو ترا غم
سرور و کیف کی سب محفلوں میں دیکھ لیا
کہیں شراب ترا غم کہیں سبو ترا غم
خیال و فکر کے سب مکتبوں میں پوچھ لیا
متاع دانش و تحقیق و جستجو ترا غم
سماع و سوز کی سب مجلسوں میں ڈھونڈ لیا
مآل ذکر و مناجات و ہا و ہو ترا غم
حرم میں حرز دل و جان قدسیاں ترا نام
صنم کدے میں برہمن کی آرزو ترا غم
سکون قلب جو سوچا تو سربسر تری یاد
نشاط زیست کو دیکھا تو ہو بہو ترا غم
غم جہاں غم جاناں غم دگر غم خویش
جہان غم میں ہر اک غم کی آبرو ترا غم
ہر ایک رنج سے گزرے ہر اک خوشی سے گئے
لئے پھرا جنہیں اک عمر کو بکو ترا غم
رہی نہ کوئی بھی حسرت کہ رکھ دیا میں نے
ہر ایک جذبہ دلکش کے روبرو ترا غم
بزم رنگ و نور میں صاحب نظر کوئی نہیں (غزل)
بزم رنگ و نور میں صاحب نظر کوئی نہیں
دیکھنے والے بہت ہیں دیدہ ور کوئی نہیں
ہم کو ورثے میں ملا ہے وہ مکاں اجداد سے
جس میں دیواریں ہی دیواریں ہیں در کوئی نہیں
ہر گلی کوچے میں اب شمس و قمر بکنے لگے
اب خریدار چراغ چشم تر کوئی نہیں
یوں تخیل میں حقائق کی ملاوٹ ہو گئی
اب فسانوں میں بھی حرف معتبر کوئی نہیں
میں نئی منزل کو نکلا ہوں پرانی راہ پر
میرے ہم راہی بہت ہیں ہم سفر کوئی نہیں
اہل دل تو خیر سب سود و زیاں میں پڑ گئے
کیا خرد مندوں میں بھی آشفتہ سر کوئی نہیں
میں داستانوں میں کھو گیا ہوں (نظم)
میں داستانوں میں کھو گیا ہوں
جہاں پہ ہر آنکھ بے مروت
جہاں پہ ہر شکل اجنبی ہے
جہاں اندھیروں میں بے نیازی
جہاں اجالوں میں بے رخی ہے
جہاں شب و روز کا تسلسل
جنوں کو زنجیر ہو گیا ہے
جہاں ہر اک ساز کا ترنم
جہاں ہر اک دل ہے زخم خوردہ
ہر ایک امید سر بہ زانو
ہر ایک احساس زرد رو ہے
نہ اب مرے ہاتھ میں قلم ہے
نہ اب مرے لب پہ مدعا ہے
نہ آرزو ہے نہ کچھ تقاضا
نہ کوئی شکوہ نہ کوئی غم ہے
نہ درد دل ہے نہ چشم نم ہے
یہ کیسی دنیا میں قید ہوں میں
یہ کن زمانوں میں کھو گیا ہوں
مرے رفیقو مجھے بچاؤ
تلاش کرکے کہیں سے لاؤ
وہ میری دنیا حقیقتوں کی
وہ میری دنیا صداقتوں کی
وہ میری یادوں کی شوخ دنیا
جو آب کہیں اور بس رہی ہے
اسے صدا دو اسے بلاؤ
کہ میں فسانوں میں کھو گیا ہوں
میں وقت کی رات کا مسافر
میں گور احساس کا مجاور
گزشتہ لمحوں شکستہ چہروں
بجھے مکانوں میں کھو گیا ہوں
کوئی مجھے ڈھونڈنے تو آئے
کوئی مرا کھوج تو لگائے
وجود کے واہموں سے پیچھے
عدم کے صحرائے بے نشاں میں
مرے تخیل کے زرد پیکر
جو شہر تخلیق کر چکے ہیں
انہیں سنوارے انہیں بسائے
محبتوں سے عبادتوں سے
چراغ آنکھوں کی روشنی سے
مرے ستاروں کو جگمگائے
مری زمینوں کو نور بخشے
ہزارہا چاند اور سورج
مری جبیں پر بجھے ہوئے ہیں
کھڑا ہوں پاتال پر ازل کے
میں آسمانوں میں کھو گیا ہوں
نہ میں کسی لب پہ جھلملایا
نہ میں کسی گوش ہی میں اترا
نہ صفحۂ سادہ کی جبیں پر
کسی نے مدت سے مجھ کو لکھا
نہ میرے معنی نہ کوئی صورت
نہ کہنے والے سے کوئی رشتہ
نہ سننے والے سے کوئی نسبت
ہوں ایک حرف قدیم گویا
نئی زبانوں میں کھو گیا ہوں
یہ میری یادوں کے سرد سائے
یہ میرے خوابوں کے زرد چہرے
رفاقتوں کے نحیف بازو
عداوتوں کے شکستہ خنجر
گزشتہ رعنائیوں کے پیکر
پرانی راہیں پرانے منظر
میں جن بہانوں سے جی رہا تھا
انہی بہانوں میں کھو گیا ہوں