عالمگیر خان کیف کی منتخب غزلیں اور نظمیں۔
ہم خدا کہتے ہیں سب جس کو صنم کہتے ہیں (غزل)
ہم خدا کہتے ہیں سب جس کو صنم کہتے ہیں
تم نہ کہنا اسے اللہ جو ہم کہتے ہیں
رنج کہتے ہیں کسے کس کو الم کہتے ہیں
ہم تو اس کو بھی ترا فضل و کرم کہتے ہیں
پڑ کے بیمار عیادت کو بلایا تجھ کو
دیکھ او رشک مسیحا اسے دم کہتے ہیں
لوگ دیتے ہیں ترے قد کو علم سے تشبیہ
ہم تری زلف کو دامان علم کہتے ہیں
اپنی بیمار سے اب تک تو ہے سوجا پھولا
ہاتھ پاؤں پہ چڑھ آیا ہے ورم کہتے ہیں
سر بھی کٹ جائے تو اے یار نہ کھائیں کبھی ہم
جس کو کہتے ہیں قسم ہم اسے سم کہتے ہیں
جو جنازہ ہے وہ انساں کو نصیحت گر ہے
وعظ کیا راہ رو ملک عدم کہتے ہیں
کھول کر نامۂ اعمال تو اپنا دیکھیں
مال و اسباب کو جو لوگ رقم کہتے ہیں
اس نے بھیجی ہے جو یہ پھول کی بوتل ہم کو
ہم اسے نخل محبت کی قلم کہتے ہیں
قصۂ عشق کو کب ایک زباں کافی ہے
کبھی کرتے ہیں بیاں وہ کبھی ہم کہتے ہیں
چشم و ابروئے بتاں شیخ و برہمن دیکھیں
دیر کہتے ہیں اسے اس کو حرم کہتے ہیں
میرے نزدیک تو یہ کم نہیں عزت میری
مجھ کو وہ بندۂ بے دام و درم کہتے ہیں
صفت کاتب تقدیر کے لکھنے والے
عرصۂ حشر کو میدان قلم کہتے ہیں
لوگ کہتے ہیں جسے پنبۂ بینا ساقی
رند مے خوار اسے ابر کرم کہتے ہیں
سائل بوسہ کو تم نے نہ دیا ہائے جواب
کچھ نہ کچھ منہ سے بشر لا و نعم کہتے ہیں
کیفؔ ہے یاد جنہیں کلمۂ موتو ہر دم
اپنی اس ہستئ فانی کو عدم کہتے ہیں
تارے بنائے کیوں فلک پیر کے لئے (غزل)
تارے بنائے کیوں فلک پیر کے لئے
کیا تھے چراغ خانۂ زنجیر کے لئے
نالہ یوں ہی ضرور ہے تاثیر کے لئے
تقدیر جیسے شرط ہے تدبیر کے لئے
شورش میں دل ہے زلف گرہ گیر کے لئے
دیوانہ غل مچاتا ہے زنجیر کے لئے
قحط جنوں یہی ہے تو پابند عشق کے
ترسیں گے ایک دانۂ زنجیر کے لئے
رکھ دینا پاس ہجر میں خنجر بھی زہر بھی
یہ ہے علاج موت کی تاخیر کے لئے
روغن چراغ طور کا درکار ہے ہمیں
او یار خوب رو تری تصویر کے لئے
مل جائے مانگنے سے اگر بھیک بھی مجھے
در در پھروں میں پارۂ تقدیر کے لئے
وہ شہسوار تو ہے کہ میکال و جبرئیل
دوڑے تیرے رکاب میں توقیر کے لئے
عمر رواں کے واسطے لازم ہے داغ عشق
روشن چراغ کرتے ہیں رہ گیر کے لئے
افسانہ خوب ہے مری زنجیر و طوق کا
حداد کو بلائیے تحریر کے لئے
پہلے تو میرے قتل کی قاتل کو فکر تھی
اب سوچ میں ہے لاش کی تشہیر کے لئے
ٹھہرا نہ ایک بھی مرے دل کے جواب میں
نقشے ہزاروں کعبے کی تعمیر کے لیے
خط کا نہ دھیان الفت ابرو میں چاہئے
نقصان مورچے سے ہے شمشیر کے لئے
چاہے اگر فروغ تو چپ بیٹھ بزم میں
کب ہے زبان شمع کی تقریر کے لئے
اس شمع رو کی بزم گلستاں سے کم نہیں
منقار عندلیب ہو گل گیر کے لئے
ابرو کا حسن اور بھی افشاں سے بڑھ گیا
جوہر سے آبرو ہوئی شمشیر کے لئے
سینہ بھی سامنے ہے جگر بھی ہے سامنے
کیا کیا ہدف ہیں یار ترے تیر کے لئے
مجھ رند کا بنے جو پس مرگ مقبرہ
خشت خم شراب ہو تعمیر کے لئے
بعد فنا یقیں ہے نہ مٹی نصیب ہو
طالب ہوں آسماں سے جو اکسیر کے لئے
مجنوں کے بعد طوق و سلاسل ہمیں ملے
ہم نے تبرکات یہ سب پیر کے لئے
گھر میں خدا کے شان یداللہ دیکھنا
دوش نبی پہ پاؤں تھے تصویر کے لئے
پیتے شراب خواب میں دیکھا ہے کیفؔ کو
پیر مغاں سا پیر ہو تعبیر کے لئے