پیر • 5 اکتوبر 2026ء
📚 کتب خانہ ۱۴۸٬۸۹۴

اختر شیرانی کی غزلیں — Akhtar Shirani Ghazals

اختر شیرانی کی منتخب غزلیں اور نظمیں۔

اے دل وہ عاشقی کے فسانے کدھر گئے (غزل)

اے دل وہ عاشقی کے فسانے کدھر گئے

وہ عمر کیا ہوئی وہ زمانے کدھر گئے

ویراں ہیں صحن و باغ بہاروں کو کیا ہوا

وہ بلبلیں کہاں وہ ترانے کدھر گئے

ہے نجد میں سکوت ہواؤں کو کیا ہوا

لیلائیں ہیں خموش دوانے کدھر گئے

اجڑے پڑے ہیں دشت غزالوں پہ کیا بنی

سونے ہیں کوہسار دوانے کدھر گئے

وہ ہجر میں وصال کی امید کیا ہوئی

وہ رنج میں خوشی کے بہانے کدھر گئے

دن رات مے کدے میں گزرتی تھی زندگی

اخترؔ وہ بے خودی کے زمانے کدھر گئے

وہ کبھی مل جائیں تو کیا کیجئے (غزل)

وہ کبھی مل جائیں تو کیا کیجئے

رات دن صورت کو دیکھا کیجئے

چاندنی راتوں میں اک اک پھول کو

بے خودی کہتی ہے سجدہ کیجئے

جو تمنا بر نہ آئے عمر بھر

عمر بھر اس کی تمنا کیجئے

عشق کی رنگینیوں میں ڈوب کر

چاندنی راتوں میں رویا کیجئے

پوچھ بیٹھے ہیں ہمارا حال وہ

بے خودی تو ہی بتا کیا کیجئے

ہم ہی اس کے عشق کے قابل نہ تھے

کیوں کسی ظالم کا شکوہ کیجئے

آپ ہی نے درد دل بخشا ہمیں

آپ ہی اس کا مداوا کیجئے

کہتے ہیں اخترؔ وہ سن کر میرے شعر

اس طرح ہم کو نہ رسوا کیجئے

اے عشق نہ چھیڑ آ آ کے ہمیں ہم بھولے ہوؤں کو یاد نہ کر (نظم)

اے عشق نہ چھیڑ آ آ کے ہمیں ہم بھولے ہوؤں کو یاد نہ کر

پہلے ہی بہت ناشاد ہیں ہم تو اور ہمیں ناشاد نہ کر

قسمت کا ستم ہی کم نہیں کچھ یہ تازہ ستم ایجاد نہ کر

یوں ظلم نہ کر بیداد نہ کر

اے عشق ہمیں برباد نہ کر

جس دن سے ملے ہیں دونوں کا سب چین گیا آرام گیا

چہروں سے بہار صبح گئی آنکھوں سے فروغ شام گیا

ہاتھوں سے خوشی کا جام چھٹا ہونٹوں سے ہنسی کا نام گیا

غمگیں نہ بنا ناشاد نہ کر

ہم راتوں کو اٹھ کر روتے ہیں رو رو کے دعائیں کرتے ہیں

آنکھوں میں تصور دل میں خلش سر دھنتے ہیں آہیں بھرتے ہیں

اے عشق یہ کیسا روگ لگا جیتے ہیں نہ ظالم مرتے ہیں

یہ ظلم تو اے جلاد نہ کر

یہ روگ لگا ہے جب سے ہمیں رنجیدہ ہوں میں بیمار ہے وہ

ہر وقت تپش ہر وقت خلش بے خواب ہوں میں بے دار ہے وہ

جینے پہ ادھر بیزار ہوں میں مرنے پہ ادھر تیار ہے وہ

اور ضبط کہے فریاد نہ کر

جس دن سے بندھا ہے دھیان ترا گھبرائے ہوئے سے رہتے ہیں

ہر وقت تصور کر کر کے شرمائے ہوئے سے رہتے ہیں

کمھلائے ہوئے پھولوں کی طرح کمہلائے ہوئے سے رہتے ہیں

پامال نہ کر برباد نہ کر

بے درد! ذرا انصاف تو کر اس عمر میں اور مغموم ہے وہ

پھولوں کی طرح نازک ہے ابھی تاروں کی طرح معصوم ہے وہ

یہ حسن ستم! یہ رنج غضب! مجبور ہوں میں مظلوم ہے وہ

مظلوم پہ یوں بیداد نہ کر

اے عشق خدارا دیکھ کہیں وہ شوخ حزیں بد نام نہ ہو

وہ ماہ لقا بد نام نہ ہو وہ زہرہ جبیں بد نام نہ ہو

ناموس کا اس کے پاس رہے وہ پردہ نشیں بد نام نہ ہو

اس پردہ نشیں کو یاد نہ کر

امید کی جھوٹی جنت کے رہ رہ کے نہ دکھلا خواب ہمیں

آئندہ کی فرضی عشرت کے وعدوں سے نہ کر بیتاب ہمیں

کہتا ہے زمانہ جس کو خوشی آتی ہے نظر کم یاب ہمیں

چھوڑ ایسی خوشی کو یاد نہ کر

کیا سمجھے تھے اور تو کیا نکلا یہ سوچ کے ہی حیران ہیں ہم

ہے پہلے پہل کا تجربہ اور کم عمر ہیں ہم انجان ہیں ہم

اے عشق! خودارا! رحم و کرم معصوم ہیں ہم نادان ہیں ہم

نادان ہیں ہم ناشاد نہ کر

وہ راز ہے یہ غم آہ جسے پا جائے کوئی تو خیر نہیں

آنکھوں سے جب آنسو بہتے ہیں آ جائے کوئی تو خیر نہیں

ظالم ہے یہ دنیا دل کو یہاں بھا جائے کوئی تو خیر نہیں

ہے ظلم مگر فریاد نہ کر

دو دن ہی میں عہد طفلی کے معصوم زمانے بھول گئے

آنکھوں سے وہ خوشیاں مٹ سی گئیں لب کو وہ ترانے بھول گئے

ان پاک بہشتی خوابوں کے دلچسپ فسانے بھول گئے

ان خوابوں سی یوں آزاد نہ کر

اس جان حیا کا بس نہیں کچھ بے بس ہے پرائے بس میں ہے

بے درد دلوں کو کیا ہے خبر جو پیار یہاں آپس میں ہے

ہے بے بسی زہر اور پیار ہے رس یہ زہر چھپا اس رس میں ہے

کہتی ہے حیا فریاد نہ کر

آنکھوں کو یہ کیا آزار ہوا ہر جذب نہاں پر رو دینا

آہنگ طرب پر جھک جانا آواز فغاں پر رو دینا

بربط کی صدا پر رو دینا مطرب کے بیاں پر رو دینا

احساس کو غم بنیاد نہ کر

ہر دم ابدی راحت کا سماں دکھلا کے ہمیں دلگیر نہ کر

للٰلہ حباب آب رواں پر نقش بقا تحریر نہ کر

مایوسی کے رمتے بادل پر امید کے گھر تعمیر نہ کر

تعمیر نہ کر آباد نہ کر

جی چاہتا ہے اک دوسرے کو یوں آٹھ پہر ہم یاد کریں

آنکھوں میں بسائیں خوابوں کو اور دل میں خیال آباد کریں

خلوت میں بھی ہو جلوت کا سماں وحدت کو دوئی سے شاد کریں

یہ آرزوئیں ایجاد نہ کر

دنیا کا تماشا دیکھ لیا غمگین سی ہے بیتاب سی ہے

امید یہاں اک وہم سی ہے تسکین یہاں اک خواب سی ہے

دنیا میں خوشی کا نام نہیں دنیا میں خوشی نایاب سی ہے

دنیا میں خوشی کو یاد نہ کر