"موراں پنکھے آگے سو گئی" (راجستھان کے ا…

"موراں پنکھے آگے سو گئی"
????(راجستھان کے ادب سے)

ہاڑ کی گٹھن بھری رات میں
موراں خرگوشنی کے کھڈے میں جھکی کھڑی ہے
پھر ہاتھ بڑھا دیتی ہے ؛
اس کا پیارا ہاتھ؛
موم کے دھاگوں کی اک بچھونی لیے
پیچھے ہٹ گیا؛ اس نے خرگوشنی کو دیکھا
وہ خراماں سو رہی تھی؛
اس کے دو ننھے بچے اس کی گردن پر چپکے تھے
موراں کھو گئی دور کہیں؛
اسے لگا
کہ یہ ملائم خرگوشنی اس کی ماں ہوتی گر
تو وہ بھی ان کی طرح
ماں سے لپٹ کر سوتی
ماں کا ٹھنڈا دامن اسے اس بند ہوا
میں سلا دیتا؛
اور وہ پنکھے کو بھول جاتی
موراں نے پھر ہاتھ بڑھایا
ایک بچہ اس کے پیارے ہاتھ کے لمس میں ٹھہر گیا
خرگوشنی غافل سوتی ہے اور
بچہ موراں کے بستر پر آ گیا ہے
موراں نے اپنی نیلے بان کی جَنْبِی
(چھوٹی چارپائی) کچے آنگن میں گھسیٹی
اور اس کی پرانی داون پر بچھونی ڈال دی
آج اس نے اپنی بھاوج کی بڑی چارپائی کو نہ دیکھا؛
آج اس نے بھاوج کی چارپائی کے آگے
تیز چلتے پنکھے کو نہ دیکھا
آج وہ اکیلی نہ تھی ؛
اس نے دیوار پہ دھونے کیلیے لٹکی
میلی کُلِّی اتار کر سرہانے رکھ لی،
اس کا بھیا اب اسے نہ پہنتا تھا
یہ موراں کا تکیہ تھا۔۔۔۔۔۔۔
موراں نے روئی کے گالے کی طرح آنکھیں موندے خرگوش کو دائیں طرف لٹا دیا۔۔۔۔۔۔
اور فلک پہ آدھے چاند کو دیکھتی سوگئی…..
موراں کے من میں اک چاہ تھی۔۔۔۔۔
جب سے تپتے آنگن میں
سر شام چھڑکاو ہونے لگا
اور اس کی بھاوج برفیلے پانی کی الگن بھر کر پنکھے میں ڈال دیتی۔۔۔۔
موراں کے من میں اک چاہ تھی ۔۔۔۔۔۔۔
اس کی نیلے بان والی جنبی بھی پنکھے آگے ہو
وہ اس ٹھنڈی ہوا میں سو سکے۔۔۔۔۔۔۔
اک چاہ تھی اسے۔۔۔۔۔۔۔۔۔
وہ پنکھے آگے سو جائے
.. ..کبھی تھوڑی دیر کیلیے
آج اس کی بھاوج موم سے بنی بچھونی
میں مٹر کے چھلکے ڈالے؛
جب خرگوشنی کے کھڈے میں جھکی تو اس کا پاؤں پھسل گیا ؛
وہ اپنے بھاری وجود سے کراہتی اٹھی
تین برس کی موراں اس سہارا دیکر چارپائی پر لے گئی۔۔۔۔۔۔۔۔۔۔۔
آج فلک پہ آدھا چاند تھا
خرگوشنی کے بچے اس کے پیٹ پر لپکیاں کھا رہے تھے
مٹر کے چھلکوں سے بھری بچھونی کھڈے میں پڑی ہے۔۔۔۔۔۔۔۔۔۔۔۔۔۔۔
کلی کھونٹی سے جھول رہی ہے۔۔۔۔۔۔۔۔
آنگن سے چھڑکاو كی مہک نہیں اٹھتی
موراں کی جنبی زینے کے ساتھ پڑی ہے
موراں اپنی بھاوج کو سہلا رہی ہے
اس کے موٹے پاوں کو دباتے جا رہی ہے۔۔۔۔۔۔۔
بھاوج آج سر شام سو گئی۔۔۔۔۔۔۔۔
موراں پیارے ہاتھ سے بھاوج کے پاوں دبا رہی ہے
موراں کب سوئے گی۔۔۔۔۔۔۔۔۔۔
رات بیتی جاتی هے
خرگوشنی کا روئی کا گولا موراں کے پیارے ہاتھ کا منتظر ہے
اک مینڈک پانی کی صراحی کی اوٹ میں ٹرٹرا رہا ہے ۔۔۔۔۔۔۔۔۔۔۔۔۔۔
موراں کے من میں اک چاہ ہے۔۔۔۔۔۔۔۔۔۔۔۔
موراں کا بلی جتنا وجود بھاوج کی کروٹ میں پڑا ہے۔۔۔۔ ۔۔۔۔۔۔
اس کی لُنگی پنکھے کی ہوا میں اڑتی ہے
موراں کی پلکیں ساکت ہیں۔۔۔۔۔۔۔۔۔۔
موراں آج سو گئی ہے ۔۔۔۔
ہاں کب سے
موراں پنکھے آگے سو گئی ہے۔۔۔۔۔۔۔۔۔۔

#حنظله_خليق