ساقی شراب لا ، کہ طبیعت اُداس ھے مطرب رُباب اُٹھا …

ساقی شراب لا ، کہ طبیعت اُداس ھے
مطرب رُباب اُٹھا ، کہ طبیعت اُداس ھے

چُبھتی ھے قلب و جاں میں ، ستاروں کی روشنی
اے چاند ڈُوب جا ، کہ طبیعت اُداس ھے

شاید ترے لبوں کی ، چٹک سے ھو جی بحال
اے دوست مُسکرا ، کہ طبیعت اُداس ھے

ھے حُسن کا فسُوں بھی ، علاجِ فسردگی
رُخ سے نقاب اُٹھا ، کہ طبیعت اُداس ھے

میں نے کبھی یہ ضد تو نہیں کی ، پر آج شب
اے مہ جبیں نہ جا ، کہ طبیعت اُداس ھے

توبہ تو کر چکا ھُوں ، مگر پھر بھی اے عدم
تھوڑا سا زھر لا ، کہ طبیعت اُداس ھے

”عبدالحمّید عدم“

بشکریہ
https://www.facebook.com/Inside.the.coffee.house