( غیــر مطبــوعــہ )
چــاند لکّھـــا ‘ نہ سـتارہ لِکّھا
بس اُسے جان سے پیارا لِکّھا
تتلیاں اُڑنے لگِیں کاغـــذ پر
میں نے جب نام تمھارا لِکّھا
میں نے اک نام سر ِ صفحۂ دل
مِٹتا جاتا تھا ۔۔۔۔۔ دُوبارہ لکّھا
جب بھی لکّھا ہے کبھی خط اُس کو
قصّـہءِ دل مَیں نے سارا لکّھا
یہ بھی لکّھا کہ نہیں بھولا مجھے
وقت جو ساتھ گزارا ‘ لکّھا
منفعَت اُس کے لئے لکھ دی اور
اپنے حصّے میں خسارہ لکّھا
اُس نے پوچھا : تمھیں کیا بھیجوں میں
میں نے ریشـم کا شـرارہ لکّھا
جب بھی سوچا ہے ‘ بَس اچّھا سوچا
جو بھی لکّھا مَیں نے’ پیارا لکّھا
میری پلکوں سے جو گر کر ٹوٹا
میں نے ہر اشکـــــ سـتارہ لکّھا
میں نے اک صفحۂ سادہ پہ ۔۔۔ حیـــاؔ !
اپنی نظروں سے نظارہ لکّھا
( حَـیــــاؔ حَـیـــات )
