نعت رسول مقبول ﷺ – رضیہ سبحان
آقائے دو عالم کی اطاعت مری منزل
محبوبِ خداوند کی مدحت مری منزل
میں خاکِ مدینہ ہوں بشر نام ہے میرا
اُس نسبتِ عالیٰ سے عبارت مری منزل
تقلید کفِ پائے محمدﷺ کی ہو توفیق
ہو ان کے اصولوں کی اطاعت مری منزل
کیا جانئے کب آئے میسر یہ حضوری
ہے روضۂ اقدس کی زیارت مری منزل
دنیا میں ہے منزل مری دربارِ مدینہ
عقبیٰ میں ہے آقا کی شفاعت مری منزل
جاگی ہوں کہ سوئی ہوں کہ زندہ ہوں کہ مردہ
ہے آپﷺ سے ہر لمحہ عقیدت مری منزل
دھڑکن کی علامت ہو سدا نامِ محمدﷺ
بس آپﷺ سے ہو میری محبت مری منزل
