یہ چاند تارے کا جِھلمِلاتا نیارا پَرچَم ہمارا پَرچ…

یہ چاند تارے کا جِھلمِلاتا نیارا پَرچَم
ہمارا پَرچَم یہ پیارا پَرچَم
یہ پَرچَموں میں عظِیم پَرچَم
عطاۓ ربِ کرِیم پَرچم ہمارا پَرچَم

ہماری عظمَت کا پاسباں ہے
ہماری مِلَّت کا تَرجُماں ہے
ہمارے اِحساس کا بیاں ہے
ہماری رِفعَت کا آسماں ہے

عظِیم مِلَّت عظِیم پَرچَم
عطاۓ ربِ کرِیم پَرچَم
ہمارا پَرچَم یہ پیارا پَرچَم

فضا میں نغمے لُٹا رہا ہے
شعُورِ مِلَّت جگا رہا ہے
دِل و نَظَر میں سما رہا ہے
تمام عالَم پہ چھا رہا ہے

بَرنگِ مَوجِ نسِیم پَرچَم
عطاۓ ربِ کریم پَرچَم
ہمارا پَرچَم یہ پیارا پَرچَم

یہی نِشانِ حرَم ہمارا
یہی ہے اَبرِ کرَم ہمارا
یہ جاں ہماری یہ دَم ہمارا
رہے گا اُونچا عَلَم ہمارا

عَلَم ہمارا عظِیم پَرچَم
عطاۓ ربِ کریم پرچم
ہمارا پَرچَم یہ پیارا پَرچَم۔۔۔!

سیف زُلفی