August 14, 1951
منتخب کلام
۔۔۔۔۔۔۔۔۔۔۔۔۔۔۔۔۔۔۔۔۔۔
کشتِ اُمّید بارور نہ ہُوئی
لاکھ سورج اُگے سحر نہ ہُوئی
ہم مُسافر تھے دھوپ کے ہم سے
ناز برداریِ شجر نہ ہُوئی
مُجھ کو افسوس ہے کہ تیری طرف
سب نے دیکھا مِری نظر نہ ہُوئی
گھر کی تقسیم کے سِوا اب تک
کوئی تقریب میرے گھر نہ ہُوئی
نام میرا تو تھا سرِ فہرست
اتفاقاً مجھے خبر نہ ہُوئی
جانے کیا اپنا حال کر لیتا
خیر گُزری اُسے خبر نہ ہُوئی
۔۔۔۔۔۔۔۔۔۔۔۔۔۔۔۔۔۔۔۔۔
اب کِسے معلُوم کیا کیا جل گیا
ایک گھر تھا ٹُوٹا پُھوٹا جل گیا
گھر کی دیواریں ہیں آئنہ بدست
خوبرُو لڑکی کا چہرہ جل گیا
شہر والوں نے کبھی پُوچھا نہیں
جل گئی کشتی کہ دریا جل گیا
حسرتیں مُرجھا گئیں اِس بار بھی
آتشِ گُل سے دریچہ جل گیا
اُس طرف کی بھی خبر لیجے کبھی
ابر بتلاتے ہیں صحرا جل گیا
آتشِ نا دیدہ ہے یہ ہجر بھی
یُوں بُجھا یہ دل کہ گویا جل گیا
کشتیوں میں آگ لے آئے تھے ہم
اِس لئے عاصمؔ جزیرہ جل گیا
۔۔۔۔۔۔۔۔۔۔۔۔۔۔۔۔۔۔۔
سچ کہا اے صبا! صحنِ گل زار میں دل نہیں لگ رہا
سایہٴ سبز میں صحبتِ یار میں دل نہیں لگ رہا
رُوپ کیا شہر کا، شکل کیا گاؤں کی، دھوپ اورچھاؤں کی
ایک تکرار ہے اور تکرار میں دل نہیں لگ رہا
وہ بدن اب کہاں، پیرہن اب کہاں، بانکپن اب کہا ں
سب بیاباں ہُوا، تیرے بازار میں دل نہیں لگ رہا
میرے تو رنگ ہی اُڑ گئے جب کہا ایک تصو یر نے
اب مجھے پھینک دو، میرا دیوار میں دل نہیں لگ رہا
صر صرِ وقت آئے بکھیرے مجھے چار اطراف میں
اب عناصر کے اس ٹھوس انبار میں دل نہیں لگ رہا
اے پرندو چلو، اے درختو چلو، اے ہواؤ چلو
گرد ہی گرد ہے، کوچہ ٴ یار میں دل نہیں لگ رہا
کیا کتابیں مری، کیا مری شاعری، رائیگا ں رائیگاں
میر و سودا و غالب کے اشعار میں دل نہیں لگ رہا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بس مجھے یاد ہے اتنا کہ ملاقات ہوئی
جانے تصویر سے تصویر کی کیا بات ہوئی
میز پر سارے ہی مشروب تھے اک مئے کے سوا
وعدہ کچھ اور تھا کچھ اور مدارات ہوئی
اس کی زلفوں میں کہ کاجل بھری آنکھوں میں کہیں
صبح سے سوچ رہا ہوں کہ کہاں رات ہوئی
چاک سب دامن ِ خالی کے رفو کر ڈالے
آج بس اتنی ہی اس ہاتھ سے خیرات ہوئی
کاش ملتے ہوئے ہوتی تو وہیں رک جاتا
اس سے بچھڑا تو بہت ٹوٹ کے برسات ہوئی
چار جانب کی تھیں چالیں میں سنبھلتا کیسے
گر کے کیا دیکھتا کس رخ سے مجھے مات ہوئی
