اب کسی دل میں نہیں کربِ خزاں
اب کسی لب پہ نہیں سوزِ فغاں
بے کفن اب بھی ہے ایّام کی لاش
مرے دِیروز کے اے نوحہ گراں!
سُرخ عارض ہیں ابھی زرد و ملول
شب کدوں پر ہے جمی وقت کی دُھول
جام ہیں آئینۂ قحطِ شراب
میکدے بند، نہ اُمّت نہ رسول
ہے وہی موسمِ چشمِ گِریاں
ہے وہی طُولِ شبانِ ہجراں
دشت و در اب بھی ہیں وحشت آلود
عاشقی اب بھی ہے اک کارِ گِراں
تار تار اب بھی ہے پیراہنِ گُل
برق کی زد پہ ہے شاخِ سُنبُل
زرد ہیں برگ، فسردہ ہے چمن
سرد، بے سوز ہے لحنِ بلبل
دُور تک پھیلا ہے تاریک گگن
کیا بتائیں شبِ زنداں کی پھبن؟
اب بھی گردن میں ہے زنجیرۂ طوق
اب بھی پاؤں میں ہے پازیبِ رسَن
کل جو تھے محرمِ اسرارِ سخن
آج اُن سب کے مقفّل ہیں دھَن
وہ مکاں جن میں تھا شورِ احساس
آج ہیں صوت و صدا کے مدفن
رنگ ہیں، شوخئ تصویر نہیں
لفظ ہیں، نُدرتِ تحریر نہیں
سینۂ سنگ ہے اب بُت کے بغیر
فن کسی درد کا نخچیر نہیں
اور اگر فن کہیں آتا ہے نظر
ہے بصر کُند، شکستہ خاطر
کِذب کا دوست، صداقت کا حریف
معنی و لفظ کا مبہم پیکر
وہ جو کہلاتے تھے فنکارِ عوام
جن کو آفاق بھی کرتے تھے سلام
منصب و جاہ و طلب کی خاطر
کر گئے عظمتِ فن کو نیلام
وہ جو کل تک تھے ادیبانِ شہیر
جن کے افکار تھے تِیر و شمشِیر
بیچ کر آج وہ جمہور کا غم
بن گئے شاہ کے برآمدہ گیر
لاکھ ویران ہو گلیاں بازار
غمِ دوراں سے اُنہیں کیا سروکار؟
اپنے ہی گھر میں سجا لیتے ہیں
اپنی بیمار انا کا دربار
خون کو رنگِ حنا کہتے ہیں
آہ کو رقصِ صدا کہتے ہیں
لبِ خاموش کو کہتے ہیں سخن
حبس کو ٹھنڈی ہوا کہتے ہیں
زخمِ جاں کو گُلِ تَر باندھتے ہیں
اشک کو نجمِ سحر باندھتے ھیں
مرگِ انبوہ پہ ہو کر شاداں
دار کو عکسِ شجر باندھتے ہیں
اب کہاں فن کا وہ پہلا منشور؟
فن ہے دریوزہ گرِ کاخ و قصور
فن فروشوں کا کرشمہ دیکھو!
کارِ سرکار بنامِ جمہور
اب بھی چہروں پہ ہے گردِ آلام
ہے ابھی دُور طرب کا ہنگام
پیشتر اِس سے کہ ہر شے مٹ جائے
لاؤ احساس کا زندہ پیغام
اب کسی دل میں نہیں کربِ خزاں
اب کسی لب پہ نہیں سوزِ فغاں
بے کفن اب بھی ہے ایّام کی لاش
مرے دِیروز کے اے نوحہ گراں
(ظہیرؔ کاشمیری)
