پردہ اُٹھا ہے کِس کا صُبحِ شبِ وِلادت
جلوہء ہے حق کا جلوہ صُبحِ شبِ وِلادت
سایہ ہے خُدا کا سایہء صُبحِ شبِ وِلادت
فصلِ بہار آئ شکلِ نِگار آئ
گُلزار ہے زمانہ صُبحِ شبِ وِلادت
پُھولوں سے باغ مَہکے شاخوں پہ مُرغ چہکے
عہدِ بہار آیا صُبحِ شبِ وِلادت
یژمُردہ حسرتوں کے سب کھیت لہلہاۓ
جاری ہُوا وہ دریا صُبحِ شبِ وِلادت
گُل ہے چراغ صرصر گُل سے چمن مُعطر
آیا کُچھ ایسا جھونکا صُبحِ شبِ وِلادت
قطرہ میں لاکھ دریا گُل میں ہزار گُلشن
نشو ونُما ہے کیا کیا صُبحِ شبِ وِلادت
جنّت کے ہر مکاں کی آئینہ بندیاں ہیں
آراستہ ہے دُنیا صُبحِ شبِ وِلادت
دِل جگمگا رہے ہیں قِسمت چمک اُٹھی ہے
پھیلا نیا اُجالا صُبحِ شبِ وِلادت
بُلبُل کا آشیانہ چھایا گیا گُلوں سے
قسمت نے رنگ بدلا صُبحِ شبِ وِلادت
ارض و سما سے منگتا دوڑے ہے بھیک لینے
بانٹے گا کون باڑا صُبحِ شبِ وِلادت
انوار کی ضیائیں پھیلی ہیں شام ہی سے
رکھتی ہے مِہر کیسا صُبحِ شبِ وِلادت
شوکت کا دبدبہ ہے ہیبت کا زلزلہ ہے
شق ہے مکانِ کسریٰ صُبحِ شبِ وِلادت
خُطبہ ہُوا زمیں پر سِکہ پڑا فلک پر
پایا جہاں نے آقا صُبحِ شبِ وِلادت
آئ نئی حکُومت سِکہ نیا چلے گا
عالم نے رنگ بدلا صُبحِ شبِ وِلادت
رُوح الامیں نے گاڑا کعبہ کی چھت پہ جھنڈا
تا عرش اُڑا پھریرا صُبحِ شبِ وِلادت
پڑھتے ہیں عرش والے سُنتے ہیں فرش والے
سُلطانِ نو کا خُطبہ صُبحِ شبِ وِلادت
چاندی ہے مفلِسوں کی باندی ہے خوش نصیبی
آیا کرم کا داتا صُبحِ شبِ وِلادت
عالم کے دفتروں میں ترمیم ہو رہی ہے
بدلا ہے رنگ دُنیا صُبحِ شبِ وِلادت
ظُلمت کے سب رجسٹر حرفِ غلط ہُوۓ ہیں
کاٹا گیا ہے سیاہا صُبحِ شبِ وِلادت
مُلکِ ازل کا سرور سب سروروں کا افسر
تختِ ابد پہ بیٹھا صُبحِ شبِ وِلادت
دِن پِھر گئے ہمارے سوتے نصیب جاگے
خورشید ہی وہ چمکا صُبحِ شبِ وِلادت
قُربان اے دو شنبے تُجھ پر ہزار جمعے
وہ فضل تُو نے پایا صُبحِ شبِ وِلادت
پیارے ربیع اوّل تیری جھلک کے صدقے
چمکا دیا نصیبہ صُبحِ شبِ وِلادت
وہ مِہر مِہر فرما وہ ماہء عالم آراء
تاروں کی چھاؤں آیا صُبحِ شبِ وِلادت
نوشہ بناؤ اُن کو دُولھا بناؤ اُن کو
ہے عرش تک یہ شُہرا صُبحِ شبِ وِلادت
محرُوم رہ نہ جائیں دِن رات برکتوں سے
اِس واسطے وہ آیا صُبحِ شبِ وِلادت
عرشِ عظیم جُھومے کعبہ زمین چُومے
آتا ہے عرش والا صُبحِ شبِ وِلادت
ہُشیار ہوں بھیکاری نزدیک ہے سواری
یہ کہہ رہا ہے ڈنکا صُبحِ شبِ وِلادت
تارے ڈھلک کر آۓ کاسے کٹورے لاۓ
یعنی بٹے گا صدقہ صُبحِ شبِ وِلادت
آمد کا شور سُن کر گِھر آۓ ہیں بِھکاری
گھیرے کھڑے ہیں رستہ صُبحِ شبِ وِلادت
ہر جان مُنتظِر ہے ہر دیدہ راہ نگر ہے
غُوغا ہے مرحبا کا صُبحِ شبِ وِلادت
ہاں دیں والو اُٹھو تعظیم والو اُٹھو
آیا تُمھارا مولیٰ صُبحِ شبِ وِلادت
اُٹھو حُضُور آۓ شاہء غیُور آۓ
سُلطانِ دین و دُنیا صُبحِ شبِ وِلادت
اُٹھو ملک اُٹھے ہیں عرش و فلک اُٹھے ہیں
کرتے ہیں اُن کو سجدہ صُبحِ شبِ وِلادت
آؤ فقیرو آؤ منھ مانگی دُعائیں پاؤ
بابِ کریم ہے وا صُبحِ شبِ وِلادت
سُوکھی زبانوں آؤ اے جلتی جانوں آؤ
لہرا رہا ہے دریا صُبحِ شبِ وِلادت
مُرجھائ کلیوں آؤ کُملاۓ پھُولو آؤ
برسا کرم کا جھالا صُبحِ شبِ وِلادت
تیری چمک دمک سے عالم جھلک رہا ہے
میرے بھی بخت چمکا صُبحِ شبِ وِلادت
لایا ہے شِیر تیرا نُورِ خُدا کا جلوہ
دِل کر دے دُودھ دھویا صُبحِ شبِ وِلادت
بانٹا ہے دو جہاں میں تُو نے ضیا کا باڑا
دید حسنؔ کا حِصّہ صُبحِ شبِ وِلادت۔۔۔!
صَلَّى ﷲُ عَلَیہِ واٰلِہٖ وَبَارِکْ وَسَلِّمْ
مولانا حسنؔ رضا خان بریلویؒ
