خدا بخشے بہت ہی شوقؔ ہم کو یاد آتا ہے وہ دل والا ت…

خدا بخشے بہت ہی شوقؔ ہم کو یاد آتا ہے
وہ دل والا تھا درد اُس میں جناب میرؔ کا سا تھا
…
آج ممتاز شاعر منشی احمد علی شوقؔ قدوائی کی برسی ہے۔
April 27, 1925
احمد علی ۔ ولادت 1852ء قصبہ جگور مضافات لکھنؤ ۔ تلمتذ ۔ مظفر علی اسیر ۔ بھوپال میں مخلف عہدوں پر فائز رہے ۔ آخر عمر میں رام پورا آ کر کتب خانہ سرکاری میں ملازم ہو گۓ۔ وفات 27 اپریل 1925ء گونڈہ
۔۔۔۔۔۔۔۔۔۔۔۔۔
۔۔۔۔
منتخب اشعار
۔۔۔۔۔۔۔۔۔۔۔۔
ظلم کرکے کیوں کسی کی آہ لو
جاؤ جاؤ اپنے گھر کی راہ لو
۔۔۔۔
جس طرف کی تان سنیے‘ اک نرالا راگ ہے
شوقؔ‘ اپنی اپنی ڈفلی‘ اپنا اپنا راگ ہے
۔۔۔۔۔۔۔
آنسو بھرے ہیں، دُور ہے، آنکھوں سے دیکھنا
بیٹھے ہوئے ہیں، شوقِ سمندر کے پاس وہ
۔۔۔۔۔۔۔۔۔
جو حسن اس میں ہے بے وفائی سے بڑھ کر
تو پھر ہرْج کیا ہے اگر بے وفا ہے
۔۔۔۔۔۔۔
خوار ہوئی کیا شوق کی مٹی،مر کر اس کے کوچے میں
پھینک بھی دو اٹھوا کر یارو ، وہ تو نہیں اٹھوانے کا
۔۔۔۔۔۔۔۔۔۔
منتخب کلام
۔۔۔۔۔۔۔۔۔۔۔۔۔۔۔۔۔۔۔
مرا حق مان کر بَن تو مرا حاجت روا ہونا
کہ میں مانے ہوۓ ہوں اے خدا تیرا خدا ہونا
تجھے سمجھے ہوۓ میں ہمیشہ سے ہمیشہ تک
نہ جانوں ابتدا ہونا نہ مانوں انتہا ہونا
ہے تیری ذات اے اللہ خود ہی مققخی تیری
نہیں ممکن ہے ایسا اور کا تیرے سوا ہونا
خرد کو عجز زیبا ہے ادب سے دم بخود ہو کر
کہ تیری معرفت تک غیر ممکن ہے رسا ہونا
خطا سے پیشتر میں ہوں خطا کا معترف یا رب
بشر ہوں اور نہیں ممکن بشر کا خطا ہونا
میں کیوں محروم رکھوں تیرے وصفِ عفو سے تجھکو
نہیں منظور یارب مجھ کو اپنا پارسا ہونا
الٰہی عفو کرنا شوقؔ پر جو قرض رہ جاۓ
ہیں اتنے حق ترے دشوار ہے جن کا ادا ہونا
۔۔۔۔۔۔۔۔۔۔۔۔۔۔
ابرو ہے کعبہ ، آج سے یہ نام رکھ دیا
ہم نے اٹھا کے طاق پہ اسلام رکھ دیا
نشے میں جا گرا جو میں مسجد میں سر کے بل
زاہد نے مجھ پہ سجدے کا الزام رکھ دیا
جھچکا وہ خوف کھا کے تو میں نے تڑپ کے خود
برچھی کی نوک پر دلِ ناکام رکھ دیا
دلچسپ نام سن کے لگے مانگنے حسیں
کس نے ذرا سے خون کا دل نام رکھ دیا
جُوڑا جو بندھ گیا تو نۓ دل کہاں پھنسیں
تو نے اُدھر لپیٹ کے کیوں دام رکھ دیا
آنکھ اس ادا سے اُس نے دکھائی کہ میں نے شوقؔ
چپکے سے اپنا مَے کا بھر ا جام رکھ دیا
۔۔۔۔۔۔۔۔۔۔۔۔۔۔۔۔
میں جو رویا خلق کی نظروں سے بادل گر گیا
اُس کی ساری آبرو پر آج پانی پھر گیا
دل میں وہ مجھ کو برا سمجھا مگر سمجھا تو کچھ
ہوں رسا اتنا کہ میں نظروں سے تا خاطر گیا
کس قدر بیدل ہوا میں جا کے اُس بدخو کے پاس
اس طرح کھویا کہ گویا کچھ بغل سے گر گیا
رہ گیا حیرت کے مارے بن کے پتلی دم بخود
سامنے اُس شوخ کی آنکھوں کے جو ساحر گیا
یوں بلائیں گرد سَر ہیں ، بادل جیسے سر کے گرد
کیا بلاؤں میں ترے بالوں کا عاشق گِھر گیا
بدگمانی سے ہوا کیا کیا نہ سَر گرداں خیال
رات کو کس کس کے گھر بن کر مرا مخبر گیا
کل نکالا جا چکا اے شوقؔ اُس کی بزم سے
آج کیوں اپنا سا مُنھ لیکر وہاں تو پھر گیا
۔۔۔۔۔۔۔۔۔۔۔۔۔۔۔۔۔۔۔
سوادِ خط ترے خط میں تری تحریر کا سا تھا
مگر بگڑا ہوا میرے خطِ تقدیر کا سا تھا
تری تصویر وہ ، جو ہے شباب آنے سے پہلے کی
فلک پر چودھویں کا چاند اُسی تصویر کا سا تھا
کبھی دیکھا نہ تھا پہچاں سکتا کیا میں گیسو کو
کچھ اُس کے سَر پہ ہاں لٹکا ہوا زنجیر کا سا تھا
کیا جادو بھی میں نے اُسکی آنکھوں پر کہ مل جائیں
مری قسمت سے وہ بھی آہِ بے تاثیر کا سا تھا
کوئی مجھ سے مرے دل کے تڑپنے کا سبب پوچھے
نظارہ اُس کی چتون کا نکیلا تیر کا سا تھا
ہوا جو دفن ابھی وہ ہو نہ ہو تیرا ہی عاشق ہو
بدن خشک اور چہرہ زرد اُسی دلگیر کا سا تھا
خدا بخشے بہت ہی شوقؔ ہم کو یاد آتا ہے
وہ دل والا تھا درد اُس میں جناب میرؔ کا سا تھا
۔۔۔۔۔۔۔۔۔