نعت رسول مقبول – سعدیہ صفدر سعدی
متاعِ عشقِ نبیﷺ سے ہے یہ جہاں سرسبز
درودِ پاک سے ہیں ساری بستیاں سرسبز
وہ ذکر ایسا بہاروں بھری مہک لایا
پڑھی جو نعت، ہوئے لامکاں ، مکاں سرسبز
چراغِ نعت دروں دل کے جب جلایا گیا
یقیں مہکنے لگا، ہوگیا گماں سرسبز
سماعتوں کو ملی مدحت نبیﷺ سے بقا
وگرنہ صوت و صدا تھے مرے کہاں سرسبز
چمک رہی ہے جو پیشانی ٔزمین و زمن
جبینِ وقت نے پایا ہے آستاں سرسبز
ہیں رنگ خاک میں سعدیؔ سبھی انہی کے طفیل
انہی کے نقشِ کفِ پا سے آسماں سرسبز
