1۔
دَرپیش ہے صحرا ‘ وہی صحرا سے گُذر کر
دُنیا میں ہی موجود ہُوں’ دُنیا سے گُذر کر
دریا مِرے اندَر تھا’ کنارے پہ جو پہنچا
مَیں اور پریشاں ہُوا ‘ دریا سے گُذر کر
اِک ریت رَواں ہے مِری سُنسان رگوں میں
آیا ہُوں ابھی دشتِ تمنّا سے گُذر کر
صورت ہی نہیں کوئی تلافی کی وہاں پر
دیکھا ہے بہت سختیء بے جا سے گُذر کر
احوال تو یہ ہے کہ مَیں خود ہی نہیں باقی
حیران ہُوں موجود و مُہیّا سے گُذر کر
مَیں کوئی کرَن بن کے اندھیرے کی ہَوا میں
دیکھوں گا کبھی اُس کے سراپا سے گُذر کر
یہ طبعِ رواں کیا ہے کہ ہَر بار ظفَرؔ ! مَیں
رُکتا ہُوں بہت مصرعِ ءاُولیٰ سے گُذر کر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
2۔
ہم نے اُسے مدَد کو پُکارا تَو ٹھیک ہے
اُس کو اگر نہیں ہے گوارا ‘ تو ٹھیک ہے
گردِش میں آسماں کی ہی گڑ بڑ نہ ہو کہِیں
ورنہ بہ ظاہِر اپنا ستارہ تو ٹھیک ہے
باہَر نِکلتا رہتا ہے دِل سے لہو اگر
ہوگی کچھ اَور وجہہ ‘ کنارہ تو ٹھیک ہے
آخر نِکل رہا ہے نتیجہ کچھ اور کیوں ؟
ہم ہی غلََط نہ ہُوں کہ اشارہ تَو ٹھیک ہے
اپنے بحال ہونے میں کچھ دیر ہو’ تَو ہو
خوش ہیں کہ اب مِزاج تمہارا تَو ٹھیک ہے
جھلکی نہیں وہ سانولی صورت ابھی’ ظفَرؔ !
ہم نے اِس آئنے کو نکھارا تَو ٹھیک ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
3۔
تمہارے پَرس میں رکّھا ‘ نہ اُس کی جیب میں ڈالا
کسی نے خوابِِ دُنیا بس ہماری جیب میں ڈالا
اب اِتنی آرزو دِل میں سما سکتی بھی تھی کیوں کر
بڑا انعام تھا ‘ جو سب سے چھوٹی جیب میں ڈالا
مِلا ہے جو بھی کچھ مالِ غنیمت’ چھوڑیے اِس کو
وہ اگلی جیب میں اُڑسا کہ پچھلی جیب میں ڈالا
سو اِتنی بھیڑ میں اچّھا نہیں لگتا تھا ویسے بھی
سو’ لے کر اُس سے بوسہ ہم نے خالی جیب میں ڈالا
نہیں معلوم ساری جمع پونجی کیا ہُوئی آخر
کہ جو کچھ تھا اُسی سوراخ والی جیب میں ڈالا
کسی بَس کا ٹِکٹ ، بجلی کا بِل اور اَسپرو نکلے
جو ڈالا بھی تو ہم نے ہاتھ کیسی جیب میں ڈالا
ظفَرؔ ! رختِ سفَر کچھ بھی نہ تھا جس کی جگہ ہم نے
خدا کا ایک ٹکڑا آخر اپنی جیب میں ڈالا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
( ظفَرؔ اقبال )
