ایک زمین شکیلؔ بدایونی سیّد مبارک شاہ ۔۔۔۔۔ شکیل ب…

ایک زمین
شکیلؔ بدایونی
سیّد مبارک شاہ
۔۔۔۔۔
شکیل بدایونی

مِرے ہم نَفَس مِرے ہم نَوا مُجھے دوست بن کے دغا نہ دے
مَیں ہُوں دَردِ عِشق سے جاں بَہ لَب مُجھے زِندَگی کی دُعا نہ دے

مِرے داغِ دِل سے ہے روشنی اِسی روشنی سے ہے زِندَگی
مُجھے ڈر ہے اے مِرے چارہ گر یہ چراغ تُو ہی بُجھا نہ دے

مُجھے چھوڑ دے مِرے حال پر تِرا کیا بھروسہ ہے چارہ گر
یہ تِری نوازِشِ مُختَصَر مِرا درد اور بڑھا نہ دے

مِرا عَزم اِتنا بلند ہے کہ پرائے شُعلوں کا ڈر نہیں
مُجھے خوف آتشِ گُل سے ہے یہ کہِیں چَمَن کو جلا نہ دے

وہ اُٹھے ہیں لے کے خُم و سَبُو ارے او شکیلؔ کہاں ہے تُو
تِرا جام لینے کو بزم میں کوئی اور ہاتھ بڑھا نہ دے۔۔۔!

۔۔۔۔۔
مبارک شاہ

کہِیں جَل کے تابِ نِگاہ سے مُجھے دیکھنے کی سزا نہ دے
جِسے لوگ کہتے ہیں روشنی مِری تیرگی کو بُجھا نہ دے

یہ گُمانِ صُبحِ بقا کہِیں نہ یقینِ شامِ فنا بنے
کہ اذانِ خوابِ سَحَر مُجھے شبِ زِندَگی میں سُلا نہ دے

یہی ایک لَمحہِ جاں گُسَل تَو نَوِیدِ راحَتِ دَرد ہے
دِلِ بے خَبَر یہ متاعِ جاں کہِیں آنسُوؤں میں لُٹا نہ دے

مِرے حادثاتِ حیات میں تِری کائنات کی خیر ہو
کہ یہ اِرتِعاشِ نَظَر مِرا تِرے آسماں کو گِرا نہ دے

یہ خیال! مِہرِ نِشاطِ نَو کہ یہ تیز تر تِری روشنی
رہِ چَشمِ نَم سے گُزر چلے تَو دھنَک کو تیری جَلا نہ دے۔۔۔!