در و دیوار کو تسکیں کا عنواں ہم بھی کر لیتے …

در و دیوار کو تسکیں کا عنواں ہم بھی کر لیتے
محبت دردِ سر ہوتی تو درماں ہم بھی کر لیتے

ہمیں اہلِ جنوں کی عظمتوں کا پاس تھا ورنہ
غبارِ راہ کو آغوشِ جاناں ہم بھی کر لیتے

جلا رکھی تھی ہم نے مشعلِ جاں دشتِ غربت میں
وگرنہ احترامِ شامِ ہجراں ہم بھی کر لیتے

تری زلفِ پریشاں نے ہمیں چونکا دیا ورنہ
جنوں میں زحمتِ چاکِ گریباں ہم بھی کر لیتے

ہمارا تیرگی سے کوئی سمجھوتا نہیں ممکن
نظر محدود ہوتی تو چراغاں ہم بھی کر لیتے

شعورِ حُسن و رعنائی سے بیگانے سہی لیکن
بہار آتی تو دو تنکے فروزاں ہم بھی کر لیتے

غمِ جاناں میں جینے کا سلیقہ آ گیا ورنہ
جوانی کو خرابِ کفر و ایماں ہم بھی کر لیتے

کبھی اے دِل تڑپنے کے لئے تو بھی تڑپ جاتا
ذرا نظارہ حُسنِ پشیماں ہم بھی کر لیتے

ہمیں تو زندگی کی ہر ادا محبوب تھی قابلؔ
وگرنہ امتیازِ درد و درماں ہم بھی کر لیتے

قابلؔ اجمیری

المرسل: فیصل خورشید