چوری کہِیں کُھلے نہ نسیمِ بہار کی خوشبُو اُڑا کے ل…

چوری کہِیں کُھلے نہ نسیمِ بہار کی
خوشبُو اُڑا کے لائی ہے گیسُوئے یار کی

جُرأت تو دیکھیئے گا نسیمِ بہار کی
یہ بھی بَلائیں لینے لگی زُلفِ یار کی

اللہ رکھّے اُس کا سلامت غُرُورِ حُسن
آنکھوں کو جِس نے دِی ہے سزا اِنتِظار کی

گُلشن میں دیکھ کر مِرے مَستِ شباب کو
شرمائی جا رہی ہے جوانی بہار کی

اے میرے دِل کے چین مِرے دِل کی روشنی
آ اور صُبح کر دے شبِ اِنتِظار کی

اے حشرؔ دیکھنا تو یہ ہے چودھویں کا چاند
یا آسماں کے ہاتھ میں تصوِیر یار کی۔۔۔!

شاعر آغا حشرؔ کاشمیری
آواز ٹینا ثانی