لفظ ٹُوٹے لبِ اِظہار تک آتے آتے
مَر گئے ہم ترے معیار تک آتے آتے
مَر گئے ہم ترے معیار تک آتے آتے
ایک لمحے کی مسافت بھی بڑی ہوتی ہے
ہم کو تو عمر لگی ، یار تک آتے آتے
ایسے لگتا ہے کہ آسودگی قسمت میں نہ تھی
جل گئے سایہِ دیوار تک آتے آتے
کس طرح سلب ہوئی قوتِ گویائی بھی
کیا بنی آپ کی سرکار تک آتے آتے
ہم سمجھتے تھے کہ کُچھ وقت لگے گا شاید
تیرے اِنکار کو اِقرار تک آتے آتے
ہاتھ رکھنا پڑا سینے پہ ہمیں بھی آخر
دل کہاں رہتا ہے دِلدار تک آتے آتے
سعدؔ یہ بات بتانے کی نہیں دنیا کو
رو پڑے ہم بھی خریدار تک آتے آتے
سعدؔ اللہ شاہ
المرسل: فیصل خورشید
