بے پردہ ایک دم رخِ جاناں نہیں رہا پردہ اُٹھا تو ہو…

بے پردہ ایک دم رخِ جاناں نہیں رہا
پردہ اُٹھا تو ہوش میں اِنساں نہیں رہا

ترکِ وفا سے کون پشیمان نہیں رہا
یہ جرم بے سیاست ایماں نہیں رہا

درگاہ کبریا ہے دربارِ گاہِ عشق
اس در پہ آج تک کوئی درباں نہیں رہا

سجدے مین حُسن مسندِ شہنشاہی پہ عشق
کچھ ایلِ دل میں اوجِ سلیماں نہیں رہا

ہے فطرتِ جمال ازل سے جنونِ شوق
ہے کون گل کہ چاک گریباں نہیں رہا

خود جلوے کھولتے ہیں یہ سمٹا ہوا ورق
اب دل کو عذرِ تنگئی داماں نہیں رہا

چلمن مژہ کہ اب ہے رقیبِ نگاہِ شوق
اب ناز پردہء رخ جاناں نہیں رہا

کیا جانے آہ کاوشِ پیہم کی لذتیں
وہ دل کہ جس میں ٹوٹ کے پیکاں نہیں رہا

ہر روز روزِ محشر ہے جلوہ تو عام کر
ہر دل پکار اُٹھے کوئی ارماں نہیں رہا

کس روز دل کی آہ سے کانپا نہ آفتاب
کس رات زلزلے میں بیاباں نہیں رہا

تا روزِ حشر شکر کا سجدہ ہے اور یہ سر
دم بھر وہ قتل کر کے پشیماں نہیں رہا

کہتے ہیں تجھکو قتل کیا اپنے ہاتھ سے
جانبازیوں کا اب کوئی احساں نہیں رہا

کعبہ میں کیا ارم میں گۓ ہم نہ سر کے بل
کب امتیازِ کوچہء جاناں نہیں رہا

شعلے وہی بگولے وہی آندھیاں وہی
کیا مر کے قیس جان بیاباں نہیں رہا

بیٹھے ہیں یوں وہ زلفِ پریشاں سنوار کے
اب جیسے ایک دل بھی پریشاں نہیں رہا

علامہ سید محمد احمد بیخودؔ موہانی

کلیاتِ بیخودؔ سے انتخاب