تسکین کی اور تو کوئ صُورت یہاں نہیں
لاویں زبان پہ نام تِرا سو زباں نہیں
بیخود ہیں بے حواس ہیں تاب و تواں نہیں
وہ کیا یہاں نہیں ہے کہ ہم خود یہاں نہیں
اے ہم نفس یہ حسرتِ دیدار دیکھنا
روتا ہُوں زار زار پر آنسُوں رواں نہیں
ہوتی ہے اب جفا بھی تو دُشمن کے جان پر
تُم کو خیالِ رنجِ دِل دوستاں نہیں
کیونکر کُھلے مُعاملہء شوق و اِلتِفات
وہ کم سُخن اِدھر مِرے منھ میں زباں نہیں
ساری بہار سایہء گُلبن میں کٹ گئی
مُجھ سے زیادہ کوئ خرابِ آشیاں نہیں
سارے سِتم قُبُول جو رشکِ عدُو نہ ہو
یہ دُشمنی ہے ناز نہیں اِمتِحاں نہیں
یوں کج روِش ہے چرخ کہ گویا ہمارے پاس
آہء شرر فِشاں مِژہء خُوں فِشاں نہیں
شاہد ہے تیرے کِینہ سے اُمّیدِ ترکِ عِشق
ناصِح ہمارے حال پر اب مہرباں نہیں
مرگِ طرب سے خوش ہُوں کہ بِیمِ فِراق ہے
شامِ وِصال حسرتِ تاب و تواں نہیں
کیوں بند کردیں مےکدہ جا تیری خیر ہو
جانا کہ مُحتسِب ہے تُو پیرِ مُغاں نہیں
عالم وہی ہے عِشق وہی بعدِ مرگ بھی
کہتا ہے کون جان نہیں تو جہاں نہیں
آدابِ عِشق تھا نہ لڑے ذِکر غیر پر
ورنہ کِسی کے بس میں کِسی کی زباں نہیں
پِیری میں سر نہ ہِلنے کا کیا شِکوہ ضعیف سے
زیبا نہیں یہ عِشق تُم اصغرؔ جواں نہیں۔۔۔!
۔۔۔۔۔
ہر بات پر ہماری نہیں کب وہاں نہیں
دُشمن کی بات کون سی ہے جِس پہ ہاں نہیں
دعویٰ ہے غیر کو کہ اِس میں خوفِ جاں نہیں
مرتا ہُوں مَیں کہ اُن کو مِرا اِمتِحاں نہیں
کب دِل گُداز حوصلہ سوزِ نِہاں نہیں
کب لب پہ میرے نالہء آتِشِ فِشاں نہیں
اُس تُند خُو رنجشِ بیجا کا کیا عِلاج
دُنیا میں چارہء اجلِ ناگہاں نہیں
یارب کہاں تلک سِتم اُس کے اُٹھا سکُوں
آخِر مَیں کُچھ فریفتہء آسماں نہیں
آئ ہے شامِ ہِجرِ قیامت ہزار بار
آثارِ صُبح چرخ پہ اب تک عیاں نہیں
اِخفاۓ رازِ عِشق ہے منظُور گو ہمیں
پر حالِ زار یہ ہے کہ کُچھ بھی عیاں نہیں
میرے تمام ہونے سے کیونکر تمام ہو
ظالِم شبِ فِراق ہے عُمرِ رواں نہیں
باغِ بہشت کو مَیں جہنّم بناؤں گا
گر دھیان آگیا کہ یہ کُوۓ بُتاں نہیں
کیوں وقتِ مرگ نالِشِ روزِ جزا پہ جنگ
تابِ سُخن بھی مُجھ میں تو اے بدگُماں نہیں
اصغرؔ خموش ہو رہے پڑھ کر جو چند شعر
کیا اِس دیار میں کوئ اہلِ زباں نہیں۔۔۔!
