لا معکُوس
سَر ِ ایوان ِ کَیاں تُم دیکھا
وقت کو ایڑ لگانے والے
ثانیے
صدیوں کے دَر کھولتے ہیں
مادّی دُنیا کے بِھیتر سے گزرے دن رات
کس قدَر سخت زباں بولتے ہیں
( دَر و دیوار کہ جَھڑتا ہُوا لا )
بے جنُوں جی لیے
پر لام الِف لام الِف ہی لِکّھا
سائنسوں کے لیے
کچھ اور اِملاؑ
بُوجھ کے ‘ پوچھ کے لِکّھا کرتے
مِل ‘ فرائڈ کہ سمِتھ اُور ایڈلر ٭
ہر روایت پہ بڑے حرفوں میں لِکّھا کیے لا
( ایک سے پانچ صدی تک کا سخُن )
فلسفہ کے تلے اَخلاق بھی تھا
پھر بھی اَخلاق ” بَہ قول ِ زَر طَشت ” ٭
اور کا اور ہُوا
ارض ِ مغرِب نے یہی اوڑھا
اِسی کو پہنا
اُس کی پھینکی ہُوئی اُترن کے بھی گاہک ہم سے
بِیسیوں ‘ سیکڑوں ‘ لاکھوں ‘ شاید
” تھینک یُو ” کہتے ہُوئے
باندھی اُترن کے جہازوں کے گَلے میں گھنٹی
سار باں ! تیز بیا
سار باں ! تیز تَرَک
پیار سے دُور
ہوَس سے بھرپُور
لہریے لیتی ہُوئی جسم کی بُھوک
موج ِمَے ‘ حُسن و لطافت کا خمار
رنگ و آہنگ و قمار
کیسی نووا ( Casinova ) ہو کہ کیسی نو ( Casino )
رات کے آخری پَل تک کا ساتھ
” جشن ”
جشن مگر کتنی دیر
شرق سے غرب تک آواز تھی خیّام کی
” کُو ۔۔۔ کُو ۔۔۔۔ کُو ۔۔۔؟؟؟”
کچھ نے ” یاھُو ” سُنا
کچھ نے ” باھُو ”
ڈر کے
ابُوالہول صدا دیتا ہے
” خُو ۔۔۔۔ خُو ۔۔۔۔ خُو ۔۔۔ ”
شاہ فارُوق کا کہنا تھا :
شاہ بس پانچ ہی رہ جائیں گے
تاش کی گڈّی میں چار
اِک سَر ِ اورنگ افرنگ
پانیوں پر سے بھی غائِب ہُوئے افرنگی علَم
ساری اقوام پہ
سورج کا اُترنا ‘ چڑھنا
اُن کے اب اپنے حوالوں سے ہُوا
کون افرنگی تھا ؟
” کُو ۔۔۔۔ کُو ۔۔۔ کُو ۔۔۔ کُو ۔۔۔ ”
پانچ اِنکار کی صدیوں کا نزول
آپ ویرانہ طلب کرتا ہے
تم جو تاریخ کے انجام پہ آ پُہچے
تو حیرت کیسی ؟
خاتمہ رشتوں کا ‘ اَخلاق کی دُنیا داری
ایڈز تلک ۔۔۔۔۔۔۔۔۔ نفی ء تہذیب ِ نَوی
شک کی بُنیاد پہ قایم تہذیب
کتنی گہرائیاں تاریخ کو دے سکتی تھی ؟
طالبا ! تم کو بھی جلدی تھی بہُت
( نام لیتے ہو بہُت جن کا ‘ کچھ ” اُن ” کی سُنتے )
اہل ِ لندن تو تھکے جاتے تھے کہتے کہتے
” آپ گِرنے کو ہے لندن کا پُل ”
خسرو و سِیزر و توتن خامن
خوف کی صف میں سبھی اِستادہ
دیکھ ‘ کورُوش ِ کبیر !
آریہ مہر تجھے کہنے یہ آیا ہے کہ
وہ جاگا ہے
( خواب میں خواب سے باہَر کا خواب )
وہ کہاں جاگا تھا
خوف والے ہی فقط جاگتے تھے
جاگ اُٹھی تھیں وہ خلائق ‘ جن کو
شب دَر انداز سِپاہ ِ ساوک ٭
” بے کَسی ہاے تماشا ” ۔۔۔۔ منظر
بے یقینی کا یقیں
خاک بھی اپنی نہیں
معنی ء حِرص و ہوَس اور سے ہیں
معنی ء مِہر و محبّت مَہا کاج
عکس بَر عکس نہَند
دُھل گیا لام ‘ الِف
لِکّھا الِف ‘ لام اور مِیم
” دو صدی سے تو یقیناّ تھے ہم آدھے مومِن
پیتے تھے
قرض کی پیتے رہے مَے
( اب بھی جنّت میں لِکھا رکّھی ہے )
راب کی ‘ مَوّے کی ‘ کِیکر کی مَے
ذرا محفوظ نہیں ”
قرض لینے کی ہوَس میں کیا تم
اُن کے جاسُوس بھی اپنا لو گے
وہ تو تَحریر لِکھا لیں کہ آتے لمحوں
” مسجدوں کے نہ رکھو گے مینار
مَرد پہنا نہ کریں گے دستار
لڑکیوں کے لیے چادر بے کار ”
آپ ہی اسقَف ِ دِیں لِکھ دے گا
دانِش افروز کا فتوٰی ہو گا
” ہمیں مینار سے لگتا ہے ‘ تمہارا مذہب
صِرف مَردوں کا ہے دِیں ”
کوئی پُوچھے کہ
حیا کو Taboo
کس نے ٹھہرا دیا ؟
عورت پَن کو
کس نے بَن باس دیا ؟
مَین ہٹَن کا بھی سُنا آرکسٹرا ؟
کالے گورے بٹن اُتفاں خیزاں
ایک کورس میں اُٹھاتے ہیں سوال
” ختم کیا ہو گئی عالَم گِیری ؟
پہلے ہفتے ہی مہُورت کے کیا
نئی تصویر اُتر جائے گی ؟
٭ نطشے کی ” Ano Also Sppak Zarthushtra ”
* ایران کے آخری بادشاہ کی قایم کردہ دہشت انگیز سپاہ
٭
( احسان اکبر )
