ایک زمین دو شاعر ردیف (کِسے دُوں کِسے نہ دُوں) امی…

ایک زمین دو شاعر
ردیف (کِسے دُوں کِسے نہ دُوں)
امیرؔ مینائ
مُحمّد ابراہیم خان رُوحیؔ
۔۔۔۔۔
شمشیر ہے سِناں ہے کِسے دُوں کِسے نہ دوں
اِک جانِ ناتواں ہے کِسے دُوں کِسے نہ دُوں
مہمان اِدھر ہُما ہے اُدھر ہے سَگِ حبیب
اِک مُشتِ اُستُخواں ہے کِسے دُوں کِسے نہ دُوں
درباں ہزار اِس کے یہاں ایک نقدِ جاں
مال اِس قدر کہاں ہے کِسے دُوں کِسے نہ دُوں
بُلبُل کو بھی ہے پُھولوں کی گُلچیں کو بھی طلب
حیران باغباں ہے کِسے دُوں کِسے نہ دُوں
سب چاہتے ہیں اُس سے جو وعدہ وِصال کا
کہتا ہے وہ زباں ہے کِسے دُوں کِسے نہ دُوں
شہزادی دُختِ رز کے ہزاروں ہیں خواست گار
چُپ مُرشِدِ مُغاں ہے کِسے دُوں کِسے نہ دُوں
یاروں کو بھی ہے بوسے کی غیروں کو بھی طلب
ششدر وہ جانِ جاں ہے کِسے دُوں کِسے نہ دُوں
دِل مُجھ سے مانگتے ہیں ہزاروں حسیں امیرؔ
کِتنا یہ ارمغاں ہے کِسے دُوں کِسے نہ دُوں۔۔۔!
۔۔۔۔۔
دِل ہے جِگر ہے جاں ہے کِسے دُوں کِسے نہ دُوں
وہ شوخ مہماں ہے کِسے دُوں کِسے نہ دُوں
کمبخت دِل کو پِھر ہُوئ زُلف و ذقن کی چاہ
یہ سانپ وہ کنواں ہے کِسے دُوں کِسے نہ دُوں
جان کو ہوس ہے ابرُو و مِژگاںِ یار کی
یہ تیغ وہ سِناں ہے کِسے دُوں کِسے نہ دُوں
آئ اجل اُدھر ہے اِدھر اِنتِظارِ یار
کیا کشمکش میں جاں ہے کِسے دُوں کِسے نہ دُوں
کعبہ اُدھر ہے اور اِدھر کُوچہء صنم
سجدہ پہ دِل تپاں ہے کِسے دُوں کِسے نہ دُوں
یوسف ہے ایک اور خریدار سیکڑوں
چُپ میرِ کارواں ہے کِسے دُوں کِسے نہ دُوں
ناز و ادا و غمزہ خریدارِ دِل ہُوۓ
یہ جنس بس گراں کِسے دُوں کِسے نہ دُوں
پیاسے کھڑے ہیں قاضی و مُلّا و مُحتسِب
یہ بادہء مُغاں ہے کِسے دُوں کِسے نہ دُوں
رُوحیؔ اُدھر ہے ناصِح خود میں اِدھر یہ بُت
ایماں ہے ایک جاں کِسے دُوں کِسے نہ دُوں۔۔۔!
…..
بشکریہ محبت خان