حمدِ باری تعالٰی
شائستہ سحرؔ
شائستہ سحرؔ
سرِ خیال بھی تُو ہے، پسِ خیال بھی تُو
تِری مِثال کہاں ہے، کہ بے مِثال بھی تُو
تِری ہی ذات سے منسُوب روز و شب میرے
کہ میرا دِن، میرا لمحہ بھی، ماہ و سال بھی تُو
تِرے ہی ذکر نے بخشی ہے روشنی مُجھ کو
تِرا ہی عکس ہے مُجھ میں، ہے خدّ و خال بھی تُو
تِرے مزاج سے مملو مِری غزل گوئی
مِرا خیال بھی تُو ہے، مِرا جمال بھی تُو
سحرؔ نے پائی ہیں جو نعمتیں، عطا ہیں تِری
ہُنر بھی میرا ہے تُو ہی، مِرا کمال بھی تُو
شائستہ سحرؔ
