( غیــر مطبــوعــہ )
زندگی کچھ نفـی ‘ کچھ اِثبات بَھر
اَجـر بھر غم اُور خوشی خیرات بھر
خطّہء مشکل ہے یہ دنیا ‘ یہاں
سب کے سب مشکل میں احساسات بھر
سب یہاں تعمیـرِ جنّت میں لگے
ہر بشـر شــدّاد ہے اوقات بھر
اٹھ چکی دُنیا سے اب رسمِ وفا
عشق قلّت بھر’ ہـوَس بہتات بھر
مجھ کو یہ دنیا خوش آتی ہی نہیں
اپنے دامن میں تو یہ سوغات بھر
زندگی میں اُس کی یادوں سے نجات
چھت ٹپکتی رہ گئی برسات بھر
میرے قالب میں نہ جانے کون ہے
میں نہیں ہوں ۔۔۔۔ میری معلومات بھر
(ق)
خاک تھےاک دوسرے کی چھانتے
رَت جگا ہوتا تھا اکثر رات بھر
چاند اب آنگن میں قدم رکھتا نہیں
یہ سہولت تھی تمہارے سات بھر !
( تســـلیـمؔ نیـــازی )
