( غیــر مطبـوعـہ ) جو دیکھو تو ہم اپنے غَیب میں س…

( غیــر مطبـوعـہ )

جو دیکھو تو ہم اپنے غَیب میں سب سے اُجاگر ہیں

کہ ہم اپنی عدم مــــوجــــودگی کا پیش منظـــــر ہیں

بسر کرتے ہیں اِس عرصے میں پوری زندگی اپنی

یہ ہم جو ایک پل کے لاکھویں حصّے کے اندر ہیں

نمُـــو داری ہے ایمـــازون جنگل کی طــرح ان کی

الم پھـــیلے ہوئے کتنے ہی برّ ِ اعظــــــموں پر ہیں

نگر کا شــــور شــایــد پُھولنے پھلنے نہ دے تم کو

کہ جو گنجـان ہیں جتنے، وہ آبادی سے ہٹ کر ہیں

اِسـی کُہــرے میں سورج کی مَحبّت جڑ پکڑتی ہے

ہمـــارے واسـطے دُھندلی رُتیں رومــــان پرور ہیں

کُھـــــلا رہتا ہے اَن دیکھے جہــانوں کا سفــر نامہ

قدم تکــــ بھی وہاں رکّھـــا نہیں جو راہیں ازبر ہیں

کہیــں اعـــداد سے آگے ہے امکانات کی دُنیــــــــا

نہ پہـــلو ہشت پہـــلو ہیـں، نہ پیکـر ہفت پیکـر ہیں

سَـــمُندر میــں جہــــــاں زیـرِ زمیں زینہ اترتا ہے

وہیں نیچے طلِسمی شہر ہے، باغات ہیں،گھر ہیں

سب اپنی عمـــــر کی مٹّی کو سَــونا کر نہیں پاتے

سمَـے کی تجـــرِبہ گاہوں میں جتنے کیمیــا گر ہیں

جہاں منظرمیں منظرگم ہے'پس منظرمیں پس منظر

فَضـــا کی اُن سیہ پرتوں سے ہم تھوڑا سا اوپر ہیں

جنھیں انســـــان نے پیغــــام بھیجا ہے خــلاؤں میں

کہیـں ہـــم سے بڑی تہذیب کے وہ حمــــلہ آور ہیں

سبھـی ہیں برقناطیســی نگہ داری کے گھیرے میں

جو ہیں تو خُـفتگانِ خاکــــ ہی خطرے سے باہر ہیں

نظــــر انداز ہونا ہی ہمـــــارے حق میں ہے شاہـدؔ !

جودیکھو اک جگہ پر ہیں، نہ دیکھو ہرجگہ پر ہیں

( شــاہـد ؔ مـاکلـی )