فِراقؔ گورکھپُوری ۔ نصیبِ خفتہ کے شانے جنجھوڑ سکتا…

فِراقؔ گورکھپُوری
۔
نصیبِ خفتہ کے شانے جنجھوڑ سکتا ہُوں
طلسمِ غفلتِ اِنساں کو توڑ سکتا ہُوں

نہ پُوچھ، ہےمِری مجبُوریوں میں کیا کَس بَل
مَشِیَّتوں کی کلائی مَروڑ سکتا ہُوں

اُبل پڑیں ابھی آبِ حیات کے چشمے
شرار و سنگ کو ایسا نچوڑ سکتا ہُوں

بہار جل کے خِزاں ہو، خِزاں لہک کے بہار
چمن میں ایسے شگوفے بھی چھوڑ سکتا ہُوں

نِگاہِ غیب بھی جِن تک ابھی پہنچ نہ سکی
اِن اُنگلیوں سے وہ تارے بھی توڑ سکتا ہُوں

نہ زُہد میں وہ لَچک اور نہ گُنہِ میں وہ کشِش
کہ خیر و شر کے سَروں کو بھی جوڑ سکتا ہُوں

ہے زیروبم مِری لے کا حریفِ ضربِ کلِیم
بُلند و سخت چٹانوں کو پھوڑ سکتا ہُوں

مِرے ہی سینے میں ہر صُبح تھر تھراتی ہے
شَبِ سِیاہ کی زنجیر توڑ سکتا ہُوں

فِراقؔ! دیکھ بدلتی ہے منزلِ آفاق
کہ، مہر و ماہ کی، مَیں باگ موڑ سکتا ہُوں

فِراقؔ گورکھپُوری
(شری رگھوپتی سہائے)