پھر زمیں صُــبح تک خواب ہو جائے گی ‘ آسماں صُــبح تک خواب ہو جائے گا
پھر اچانک تِرے ناز کی لہلہاتی ہری کھیتیاں خُشک ہو جائیں گی
وقت تھم جائے گا ۔۔ اَور ہر ایک منظر یہاں صُــبح تک خواب ہو جائے گا
نرم لمحوں کی آغوش میں زندگی رقص کرتی رہی ۔۔ اَور کہتی رہی
رقص کر ‘ رقص کر !! ورنہ خُوش بُو کا سَیل ِ رَواں صُــبح تک خواب ہو جائے گا
اک تمنّا کو تصویر کرنے کی خواہش میں بے دار رہنے سے کیا فائدہ ؟
یہ ستارہ ‘ یہ اُمّیــد ِ مو ہُوم کا اک نشــاں ‘ صُــبح تک خواب ہو جائے گا
نیند اک وقفہ ء بے طلَب ہے یہاں ‘ حرف ِ تعبیر کی جُست جُو ہے زیاں
چشــم ِ بے دار کو عِلم ہے ‘ ہر یقیں ۔۔۔ ہر گُماں ‘ صُــبح تک خواب ہو جائے گا
روشنی کا کٹورا لئے بام ِ تاریک سے زرد سُورج نکلنے کو ہے
اَور کچھ صَــبر کر ۔۔۔۔ یہ سُلگتا لہُو میری جــاں ! صُــبح تک خواب ہو جائے گا
دیکھ ۔۔۔۔ غَمــزہ نہ کر ‘ دیکھ ۔۔۔ عَشــوہ نہ کر ‘ عشــق کی اِنتہــا ہجر ہی ہجر ہے
وادی ء ہجر میں پھر تِرا حُــسن ِ شُعلہ بَہ جــاں ‘ صُــبح تک خواب ہو جائے گا
( خــواجــہ رضــــیؔ حـیـــــــدر )
