( غیــر مطبــوعــہ ) دن پہ لکّھـــا تو کبھـــــی …

( غیــر مطبــوعــہ )

دن پہ لکّھـــا تو کبھـــــی رات پہ لکّھا جائے

کیا ضــروری ہے کہ ہر بات پہ لکھا جائے

دشت کی جمـلہ روایات کو یک جا کر کے

ہجـر زادوں کی مہــــــمّات پہ لکّھا جائے

کوئی پوچھے بھی تو میں بات بدل لیتی ہوں

مجھ سے کب تلخی ء حـــالات پہ لکّھا جائے

یـہ مَحبّت کی کـــرامت ہے کہ اب نام ترا

کچھ بھی لکّھـوں تو مِرے ہات پہ لکّھا جائے

اک قصـیدہ ہو رقـــم ان کو بلانے کے لئے

دوســــــرا وقت ِ ملاقــات پہ لکّھا جائے

میں نے لکّھے نہیں شاہوں کےحکایت نامے

سخت مشکل تھا، خــرافـات پہ لکّھا جائے

آپ چـاہیں تو دعـاؤں کـو اکٹّھــا کر لوں

آپ چـاہیں تو مناجــــات پہ لکّها جائے

یہ مَحبّت کی وصیّت ہے سو' اے دستِ ہوا !

اِس کو ہر پھـــول پہ ' ہر پات پہ لکْھا جائے

جومصائب کے لکھاری ہوں فرحؔ! اب ان سے

کیسـے ممکن ہے فتوحــــات پہ لکّھا جائے

( سیِـــّـدہ فـــرحؔ شـــاہ )