( غیر مطبوعہ ) ضِیاے رنگ سے بھی کچھ تو دوستی کرو’…
( غیر مطبوعہ )
ضِیاے رنگ سے بھی کچھ تو دوستی کرو’ یار !
بہُت اندھیرا ہے کمرے میں ‘ روشنی کرو ‘ یار !
مَیں اِس ملال کی لذّت سے خود بھی واقِف ہوں
دل۔ِ فسُردہ جو کہتا ہے’ تم وہی کرو ‘ یار !
یہاں فراغتیں بار۔ گراں ہیں رشتوں پر
قرابتوں کا تقاضا ہے نوکری کرو ‘ یار !
بھرم ‘ نگاہ میں رکّھو وقار ِ قامت کا
بڑا ہے ظرف تو پھر بات بھی بڑی کرو ‘ یار !
چہَکتی شب میں خمُوشی ُ اُداس جنگل ہے
لبوں کے پھول مہَکنے دو ‘ بات بھی کرو ‘ یار !
نگہ میں بکھرے پڑے ہیں خیال۔ شوخ ادا
ہزار رنگ ہیں ‘ اٹّھو مصوِّری کرو ‘ یار !
جہاں بَلاے فنا گھات میں کھڑی ہے’ وہاں
یہ چار سانسیں غنیمت ہیں ‘ زندگی کرو ‘ یار !
( جاوِیدؔ عادِل سوہاوی )