شہرِ نگاراں——- اے دیارِ دوست! اے شہرِ تمنّا آ…
شہرِ نگاراں——-
اے دیارِ دوست! اے شہرِ تمنّا آج کیوں؟
آ رہی ہے یاد تیری دلبری کی بار بار
تجھ کو لے لے اپنے حلقے میں جوانی کی اُمنگ
سرنگوں ہونے نہ پائے تیری عظمت کا حصار
تیری دیواروں سے ٹکرائیں بلائیں اپنا سر
تیرے دروازے سے جائے ہو کے آفت شرمسار
مشعلِ رُخسار سے روشن ہوں تیرے بام و در
بُوئے گیسوئے معنبر سے ہوں گلیاں عطربار
تیرے دیوانوں پہ برسیں مہرباں نظروں کے تیر
عشق کے سینے پہ ہو زلفوں کی تیغِ آبدار
پھر اُڑیں ہر سمت ہاتھوں کی سنہری تتلیاں
دھو دے پھر گردِ مصیبت کو تبسّم کی پھوار
پھر کُھلیں در حُسن کے، محبوب بانہوں کی طرح
کھڑکیوں سے ہو طلوعِ جلوۂ دیدارِ یار
آرزوئیں پھر کہیں افسانۂ تعمیرِ نو
کشتئ دل سے ہو طوفانِ تمنّا ہم کنار
دُور ہو کر بھی میں تجھ سے آج ہوں نزدیک تر
اے دیارِ دوست، اے شہرِ تمنّا، کُوئے یار
جل رہی ہے دل میں تیری شمعِ محبوبی کی لَو
روح میں اُتری ہوئی ہے حُسن کے خنجر کی دھار
تیری پیشانی کو چومے فتح و نصرت کی کرن
تیرے قدموں پہ ہو قرباں گردشِ لیل و نہار
(علی سردار جعفری)