Nayyar Qureshi Gangohi کی غزلیں — Nayyar Qureshi Gangohi Ghazals

Nayyar Qureshi Gangohi کی منتخب غزلیں اور نظمیں۔

یوں زندگی کی ہم نے سیہ رات کاٹ دی (غزل)

یوں زندگی کی ہم نے سیہ رات کاٹ دی

بن چھت کے گھر میں جیسے کہ برسات کاٹ دی

آتا ہو ملک و قوم کی عزت پہ جس سے حرف

ہم نے خدا گواہ وہ ہر بات کاٹ دی

گزری جو ناگوار ہمارے ضمیر کو

مل بھی گئی تو ہم نے وہ سوغات کاٹ دی

بن جائے وجہ دشمنی جو دو گھروں کے بیچ

بچوں کی ہم نے ایسی ملاقات کاٹ دی

طوفاں میں بھی خدا کے حوالے رہی حیات

یوں ہنس کے ہم نے گردش آفات کاٹ دی

ترک تعلقات کا انجام سوچ کر

ہم نے تمام عمر ترے ساتھ کاٹ دی

اہل غرض کی چلنے نہ دی کوئی ہم نے چال

مطلب پرست لوگوں کی ہر بات کاٹ دی

جن سے نہ کچھ ملا ہمیں رسوائی کے سوا

ان دوستوں کی ہم نے ملاقات کاٹ دی

نیرؔ کو لے چلی تھی جو شہر غرور میں

ہم نے وہ رہ گزار خرافات کاٹ دی

تیری محبتوں کا طلب گار میں بھی ہوں (غزل)

تیری محبتوں کا طلب گار میں بھی ہوں

ایثار کا وفا کا پرستار میں بھی ہوں

مرعوب میں نہیں تری اونچی اڑان سے

موج ہوا سے برسر پیکار میں بھی ہوں

حرص و ہوس کا دور ہے مجبور ہیں عوام

رشوت ادائیگی کا گنہ گار میں بھی ہوں

دریا دلی کا تیری اشارہ ملا تو ہے

لیکن رہے خیال کہ خوددار میں بھی ہوں

میں کیوں کسی کی ذات پہ کیچڑ اچھال دوں

یہ جانتا ہوں صاحب دستار میں بھی ہوں

ہر اک نگاہ خاص نے سمجھا مجھے عزیز

ہاں محترم بدولت کردار میں بھی ہوں

ہے اک بکاؤ جنس سیاست میں اب ضمیر

تم بھی لگاؤ دام خریدار میں بھی ہوں

کھوٹے کھرے کا فرق سمجھتا ہوں میں حضور

اس دور کے مزاج کا فن کار میں بھی ہوں

کم ظرف نے کلف کا پہن کر لباس کیوں

دعویٰ کیا کہ رونق بازار میں بھی ہوں

نیرؔ تعلقات ہیں عاری خلوص سے

احباب کے سلوک سے بیزار میں بھی ہوں