افتخار راغب کی غزلیں — Iftikhar Raghib Ghazals

افتخار راغب کی منتخب غزلیں اور نظمیں۔

کہا میں نے مری آنکھوں میں پانی ہے (غزل)

کہا میں نے مری آنکھوں میں پانی ہے

جواب آیا محبت کی نشانی ہے

کہا میں نے لگی دل کی بجھانی ہے

جواب آیا یہ جذبہ جاودانی ہے

کہا میں نے کھلیں گے کب وفا کے پھول

جواب آیا ابھی موسم خزانی ہے

کہا میں نے محبت محور ہستی

جواب آیا بلائے ناگہانی ہے

کہا میں نے کہ ہر لمحہ سسکتا ہوں

جواب آیا کہ الفت تو نبھانی ہے

کہا میں نے ستم اتنا نہیں اچھا

جواب آیا محبت آزمانی ہے

کہا میں نے متاع زیست یعنی تو

جواب آیا یہاں ہر چیز فانی ہے

کہا میں نے کہ دیکھ ان سرخ آنکھوں میں

جواب آیا محبت آسمانی ہے

کہا میں نے کہ کیوں اتنے گریزاں ہو

جواب آیا تمہاری مہربانی ہے

کہا میں نے مری غزلوں کی جاں ہو تم

جواب آیا تمہاری خوش گمانی ہے

کہا میں نے خموشی مار ڈالے گی

جواب ان کا مکمل بے زبانی ہے

کہا میں نے سناؤ حال دل راغبؔ

جواب آیا بہت لمبی کہانی ہے

انکار ہی کر دیجیے اقرار نہیں تو (غزل)

انکار ہی کر دیجیے اقرار نہیں تو

الجھن ہی میں مر جائے گا بیمار نہیں تو

لگتا ہے کہ پنجرے میں ہوں دنیا میں نہیں ہوں

دو روز سے دیکھا کوئی اخبار نہیں تو

دنیا ہمیں نابود ہی کر ڈالے گی اک دن

ہم ہوں گے اگر اب بھی خبردار نہیں تو

کچھ تو رہے اسلاف کی تہذیب کی خوشبو

ٹوپی ہی لگا لیجیے دستار نہیں تو

ہم برسر پیکار ستم گر سے ہمیشہ

رکھتے ہیں قلم ہاتھ میں تلوار نہیں تو

بھائی کو ہے بھائی پہ بھروسہ تو بھلا ہے

آنگن میں بھی اٹھ جائے گی دیوار نہیں تو

بے سود ہر اک قول ہر اک شعر ہے راغبؔ

گر اس کے موافق ترا کردار نہیں تو