افتخار اعظمی کی منتخب غزلیں اور نظمیں۔
درد اب دل کی دوا ہو جیسے (غزل)
درد اب دل کی دوا ہو جیسے
زندگی ایک سزا ہو جیسے
حسن یوں عشق سے ناراض ہے اب
پھول خوشبو سے خفا ہو جیسے
اب کچھ اس طرح سے خاموش ہیں وہ
پہلے کچھ بھی نہ کہا ہو جیسے
یوں غم دل کی زباں مہکی ہے
نکہت زلف دوتا ہو جیسے
کتنا سنسان ہے رستہ دل کا
قافلہ کوئی لٹا ہو جیسے
رہ وفا سے میں اک گام بھی ہٹا تو نہیں (غزل)
رہ وفا سے میں اک گام بھی ہٹا تو نہیں
لہولہان ہوا ہوں مگر ڈرا تو نہیں
نظر میں شائبہ خوف کس لیے آئے
یہ سیل جبر ہجوم برہنہ پا تو نہیں
کھنچاؤ ہوتا ہے محسوس خوں کے قطروں میں
یہ روح عصر کہیں روح کربلا تو نہیں
عجب تناؤ ہے ماحول میں کہیں کس سے
کہیں پہ آج کوئی حادثہ ہوا تو نہیں
لبوں پہ حرف وفا ہے تو پھر نگاہوں میں
یہ خوف کیوں ہو کہیں کوئی دیکھتا تو نہیں
شام جب ڈھلتی ہے میں اپنے خرابے کی طرف (نظم)
شام جب ڈھلتی ہے میں اپنے خرابے کی طرف
لوٹتا ہوں سرنگوں، بوجھل قدم
بارہ گھنٹوں کی مشقت اور تھکن
بڑھ کے لے لیتی ہے مجھ کو گود میں
اور سیل تیرگی میں ڈوب جاتی ہے امید و شوق کی اک اک کرن
رہ گزار آرزو پر چار سو اڑتی ہے دھول
اور اک آواز آتی ہے کہیں سے
جو کہ انجانی بھی پہچانی بھی ہے
زندگی کچھ بھی نہیں، کچھ بھی نہیں، کچھ بھی نہیں
اک مسلسل مرگ، اک سیل بلا، نیزوں کے بن
آہوں، کراہوں کے سوا
پھر اسی تاریک لمحے، پھر اسی نازک گھڑی
آرزو کی رہ گزر پر چند نقش پا ابھرتے ہیں ستاروں کی طرح
لہلہاتا ہے کوئی آنچل بہاروں کی طرح
پھیل جاتی ہے کسی گیسو کی نکہت چار سو
ایک فردوسی تبسم کی سنہری چاندنی
دھیمے دھیمے، زینہ زینہ
گنگناتی، رقص فرماتی ہوئی
بام غم سے خانۂ دل میں اتر کر
تھپتھپاتی ہے مجھے
گیت گاتی ہے، کبھی لوری سناتی ہے مجھے
اور پھر جب صبح کو خورشید عالم تاب کی پہلی کرن
گدگداتی ہے مجھے
کار گاہ دہر میں واپس بلاتی ہے مجھے
آرزو و جستجو دل میں جواں پاتا ہوں میں
شوق کی مے کے نشے میں چور ہو جاتا ہوں میں!!