عفت زیبا کاکوروی کی غزلیں — Iffat Zeba Kakorvi Ghazals

عفت زیبا کاکوروی کی منتخب غزلیں اور نظمیں۔

مری آرزو کا حاصل مری زیست کا سہارا (غزل)

مری آرزو کا حاصل مری زیست کا سہارا

ترا اک حسیں تبسم ترا جلوۂ خود آرا

ترے درد و غم کے صدقے تری بے رخی کے قرباں

انہیں کج ادائیوں نے مری زیست کو سنوارا

مری کشتی تمنا ہے عجیب کشمکش میں

کبھی ہے قریب منزل کبھی دور ہے کنارا

کبھی یہ خیال گزرا کہ نظر کے سامنے ہو

کبھی یہ گماں ہوا ہے کہ مجھے کہیں پکارا

جو ملے بھی ہو تو کیا ہے تمہیں پا کے ڈھونڈتے ہیں

تمہیں بے رخی مبارک ہمیں جستجو گوارا

تری شان بے نیازی مرا یہ جنون پیہم

تری یاد دے رہی ہے مرے ضبط کو سہارا

کبھی نو بہار بن کر ہو چمن چمن میں رقصاں

کبھی کوئلوں کے لب پر کبھی گل سے آشکارا

کبھی دل کو چین ملتا کبھی درد دم تو لیتا

تجھے بے قرار زیباؔ اسی آرزو نے مارا

وہ ہنس پڑا جنوں یہ مچلنے لگی حیات (غزل)

وہ ہنس پڑا جنوں یہ مچلنے لگی حیات

ہاں ہاں یہی ادا یہی انداز التفات

وہ مسکرا رہے ہیں دھندلکوں کی اوٹ سے

یوں آزما رہی ہے مجھے تلخیٔ حیات

آئے ہیں وہ جنوں میں پشیمانیاں لئے

کیا کیا فریب دیتا ہے حسن تصورات

بخشی ہے کس نے میرے جنوں کو یہ آگہی

سمجھا رہا ہے کون مجھے رمز کائنات

کیا کچھ نہیں ملا مجھے ہوش و خرد سے دور

قدموں میں کائنات تو مٹھی میں شش جہات

پھولوں سے اب نہ ربط نہ کانٹوں سے احتیاط

زیباؔ بدل رہے ہیں بتدریج واقعات

میرے ان کاکل برہم کی حکایت مت پوچھ (نظم)

میرے ان کاکل برہم کی حکایت مت پوچھ

آہ اس نالۂ پیہم کی حقیقت مت پوچھ

دیکھ لے چشم بصیرت سے زمانے کا نظام

مجھ سے اے دوست مرے غم کی صداقت مت پوچھ

لب رنگیں کا وہ اعجاز کہاں سے لاؤں

ساز خاموش میں آواز کہاں سے لاؤں

داستان دل برباد سناؤں کیسے

مجھ پہ گزری ہے جو افتاد سناؤں کیسے

آتش غم سے سلگتا ہے کلیجہ میرا

دل ناشاد کی فریاد سناؤں کیسے

ہائے اب طاقت گفتار کہاں سے لاؤں

نغمۂ غم کا خریدار کہاں سے لاؤں

جام و مینا میں بہکتے ہوئے ایمان کو دیکھ

بھوک و افلاس سے مرتے ہوئے انسان کو دیکھ

ہر طرف شور ہے فریاد ہے بربادی ہے

روئے گردوں پہ مچلتے ہوئے طوفاں کو دیکھ

اب بتا چشم فسوں کار کہاں سے لاؤں

مست و بے خود سی وہ رفتار کہاں سے لاؤں

پر تجھے عشق و محبت سے کہاں فرصت ہے

مئے گل رنگ کی لعنت سے کہاں فرصت ہے

آہ مظلوم نگاہوں کا فسانہ سن لے

ہوس و حرص کی دولت سے کہاں فرصت ہے

دل بیتاب میں پھر تاب کہاں سے لاؤں

اپنی آنکھوں میں مئے ناب کہاں سے لاؤں

اپنے گلشن کی تباہی کا گلہ کس سے کروں

شام غربت کی سیاہی کا گلہ کس سے کروں

ہولیاں خون کی کھیلی گئیں انسانوں میں

اپنی نا کردہ گناہی کا گلہ کس سے کروں

اپنی نیندوں میں ترے خواب کہاں سے لاؤں

فرصت خاطر احباب کہاں سے لاؤں