حسنیٰ سرور کی غزلیں — Husna Sarwar Ghazals

حسنیٰ سرور کی منتخب غزلیں اور نظمیں۔

چاند کمرے کی کھڑکی میں ٹھہرا رہا چاندنی رات جادو جگانے لگی (غزل)

چاند کمرے کی کھڑکی میں ٹھہرا رہا چاندنی رات جادو جگانے لگی

چاندنی میرے بستر تلک آ گئی اور آنکھوں سے نیندیں اڑانے لگی

یاد کی ڈائری میں نے کھولی ہے جب سوکھے پھولوں سے خوشبو سی آنے لگی

تیز آندھی سی چلنے لگی درد کی اور اک اک ورق کو اڑانے لگی

کھل رہے ہیں خیالوں کے سب بادباں کشتیاں ساحلوں کی طرف ہیں رلی

نیلگوں نیلگوں سینۂ آب پر چاندنی کی کرن چمچمانے لگی

موسم گل کے مہکے قدم آ گئے ڈالی ڈالی دھنک رنگ آنچل اڑے

میرے گاؤں میں چپکے سے آئی صبا یاد گلشن کی مجھ کو ستانے لگی

بوڑھے پیپل کی چھاؤں میں ٹوٹا ہوا اک گھروندا ہے مٹی کا باقی ابھی

میری بچپن کی اک اک کہانی مجھے دے کے آواز واپس بلانے لگی

میری سانسوں میں مہکا کرے ہے کوئی دل کی دھڑکن میں دھڑکا کرے ہے کوئی

آنکھ کی پتلیوں میں بسا ہے کوئی میں جو گھبرا کے پلکیں جھکانے لگی

آم کی میٹھی خوشبو فضا میں اڑی جیسے کانوں میں شہنائیاں بج اٹھیں

جیسے ساجن کا آیا سندیسہ سکھی گوری ہاتھوں میں مہندی رچانے لگی

میں کہ گیتوں کی جوگن ہوں حسنیٰؔ سدا فن کے صحرا میں در در بھٹکتی پھروں

مجھ کو منزل کی رہتی ہے ہر پل لگن اک جلن میرے من کو جلانے لگی

ٹوٹا جو آسماں سے وہ تارا نہیں ہوں میں (غزل)

ٹوٹا جو آسماں سے وہ تارا نہیں ہوں میں

جگنو ہوں دشت غم کا اندھیرا نہیں ہوں میں

شاید کہ بیٹھے بیٹھے میں پتھر میں ڈھل گئی

کیا دیکھتے ہیں لوگ تماشا نہیں ہوں میں

پرچھائیں کی طرح سے وہ رہتا ہے آس پاس

تنہائیو یوں کہنے کو تنہا نہیں ہوں میں

برباد کر کے مجھ کو ستم گر ملے گا کیا

انساں ہوں کوئی سنگ کا ٹکڑا نہیں ہوں میں

اے زندگی سے کھیلنے والو یہ جان لو

کھیلو نہ مجھ سے کوئی کھلونا نہیں ہوں میں

یوں جان و روح کرب مسلسل کے ہیں شکار

زندہ ہوں دیکھنے کو یہ زندہ نہیں ہوں میں

اٹھے گی کب کرم کی گھٹا مجھ کو ڈھانپنے

یا رب بتا دے کیا ترا بندہ نہیں ہوں میں

آخری رات ہے دسمبر کی (نظم)

آخری رات ہے دسمبر کی

آرزؤں کی سج گئی ہے برات

سال نو کی بس آمد آمد ہے

لے کے آئے گا جانے کیا سوغات

تیرہ و تار محفل شب میں

نور ہی نور آج مہماں ہے

دیدنی ہے یہ جشن کا عالم

انجمن انجمن چراغاں ہے

دفن ماضی میں سارے غم کر کے

خیر مقدم کے گیت گاتے ہیں

یہ جنوں خیز سر خوشی کا سماں

گل امید مسکراتے ہیں

سال نو کی نوید لے لے کر

مدتوں سے یہ رات آتی ہے

لمحہ لمحہ پگھلتا جاتا ہے

رات جاتی ہے بات جاتی ہے

ہر قدم پر خزاں بھی گھات میں ہے

کچھ خبر بھی ہے جشن گل والو

منزلیں کتنی ہو چکی ہیں طے

مڑ کے راہوں پہ اک نظر ڈالو

عمر رفتہ کا سنگ میل یہ شب

صبح کی شکل جب دکھائے گی

موت کی رہ گزر پہ ایک قدم

زندگی اور آگے جائے گی