حمیرا گل تشنہ کی غزلیں — Humaira Gul Tishna Ghazals

حمیرا گل تشنہ کی منتخب غزلیں اور نظمیں۔

آرزوئے دل کا یہ انجام ہونا چاہیے (غزل)

آرزوئے دل کا یہ انجام ہونا چاہیے

کیا مجھے بھی عشق میں ناکام ہونا چاہیے

کیوں بھلا ابلیس کو الزام دیتے ہو فقط

تم کو خیر و شر کا بھی الہام ہونا چاہیے

باپ کی دستار بیچیں بہن کی کھینچیں ردا

مرد کی غیرت پہ اب نیلام ہونا چاہیے

مطلبی دنیا میں ہے گم ابن آدم اس قدر

کام ہونا چاہیے بس کام ہونا چاہیے

ڈھونڈنے سے گر نہیں ملتا خدا پھر ڈھونڈیئے

صبح اس کی جستجو میں شام ہونا چاہیے

گر نصیبوں میں نہیں وہ شخص لکھا اے خدا

کچھ دعاؤں کا مری انعام ہونا چاہیے

عشق کی معراج ہو اے کاش ایسا معجزہ

نام کوئی لے وہ میرا نام ہونا چاہیے

گر تجھے بننا ہے تشنہؔ شاعرہ اک بے بدل

تیرے ہر اک شعر میں ابہام ہونا چاہیے

بے دم ہوئے یوں ہو کے گرفتار محبت (غزل)

بے دم ہوئے یوں ہو کے گرفتار محبت

کہتا ہے مسیحا کہ ہوں بیمار محبت

روتا ہے شب ہجر میں دل خون کے آنسو

ملتا نہیں کوئی اسے غم‌ خوار محبت

ان حسن کی گلیوں میں خریدار بہت ہیں

لگتا ہے شب و روز یہ بازار محبت

الفاظ ہیں خنجر تو بجھا زہر میں لہجہ

ایسے میں بھلا کیسے ہو اقرار محبت

اب عشق ہے رسوا تو بگڑتا ہے ترا کیا

بیکار میں کرتا ہے تو پیکار محبت

مٹ جائیں گے ہم ان کو خبر تک نہیں ہوگی

یہ سوچ کے کرنا پڑا اظہار محبت

اب دیکھیں وہاں کون لگائے نئی بولی

آتے ہیں جہاں روز خریدار محبت

تنہائی میں سوچا تجھے جانا تجھے سمجھا

پھر کھلنے لگے ہم پہ بھی اسرار محبت

تشنہؔ سے کریں لوگ محبت کی جو باتیں

کیسے میں بتاؤں کہ ہوں بے زار محبت

پورن ماشی رات سجی جب (نظم)

پورن ماشی رات سجی جب

ساتھ زمیں بھی ڈول پڑی

اک مورت آخر بول پڑی

اک بار نہیں سو بار نہیں

کیوں چاہت کا اقرار کروں

کیوں رقص کو اپنے عام کروں

جس کام کا حاصل کوئی نہ ہو

کیوں ایسا کوئی کام کروں

ہے کوئی جو مجھ میں کہتا ہے

جو دل میں ہے اب بول ذرا

کچھ دیر کو گھنگرو کھول ذرا

یہ رقص جو تو کرتی ہے یہاں

اس رقص میں تیرے وحشت ہے

جس شخص کی چاہت الفت ہے

وہ شخص زمیں کا باسی ہے

وہ عام رویوں والا ہے

وہ تیری وفا کیا سمجھے گا

وعدوں کو نبھانا کیا جانے

وہ عشق دوانہ کیا جانے

وہ شخص جو دنیا دار بھی ہے

زردار ہے یوں نادار بھی ہے

آزاد بھی ہے

اب اس کی چاہت چھوڑ کے تو

خلوت میں خود سے بول کبھی

اور خود میں خود کو گھول کبھی

یہ عشق کتابی عشق ہے جو

لمحوں کی لذت دیتا ہے

پھر اس کی قیمت لیتا ہے

اس عشق و محبت میں پڑ کر

تو خود کو یوں ناشاد نہ کر

برباد نہ کر

آ تجھ کو تجھ سے ملواؤں

تو کیا ہے تجھ کو بتلاؤں

تو جنت ہے تو رحمت ہے

تو قوت ہے تو راحت ہے

تو ثروت ہے تو برکت ہے

اور سب سے بڑھ کر عورت ہے

ان لفظوں کو بھی تول ذرا

خلوت میں خود سے بول ذرا

کچھ دیر کو

گھنگرو کھول ذرا