ہدایت اللہ کی منتخب غزلیں اور نظمیں۔
کبھی سر بہ سجدہ ہوا تھا دل کبھی ہر قدم پہ قیام تھا (غزل)
کبھی سر بہ سجدہ ہوا تھا دل کبھی ہر قدم پہ قیام تھا
کہ وہ راستہ ترے شہر کا سبھی راستوں کا امام تھا
کبھی درد طول فراق تھا کبھی دکھ کہ وصل ہے مختصر
رہ عشق میں تو سکون کا کوئی ایک پل بھی حرام تھا
جسے خود سری کا غرور تھا جو خود آگہی کا ظہور تھا
وہی دل گدائے رہ طلب تری اک نظر کا غلام تھا
نہ تو ہم سفر سے امید تھی نہ ہی راہبر پہ یقیں تھا
ترے شہر کے سبھی راستوں کا عجیب سا ہی نظام تھا
اسی جستجو میں سدا رہا کہ تری طلب کو فروغ ہو
مری خواہشوں میں چھپا ہوا تری آرزو کا دوام تھا
مجھے کن کہا تو میں ہو گیا فیکن میں ہی کمال تھا
میں اسیر عہد الست ہوں کہ بلٰی مرا ہی کلام تھا
ترے نام سے جو الگ ہوا تو بنا ہدایتؔ بے نوا
کہ ازل کے شہر وجود میں ترا نام ہی مرا نام تھا
منتظر انسان اپنے فکر کی تمجید کا (غزل)
منتظر انسان اپنے فکر کی تمجید کا
وقت آئے گا کبھی انسان کی توحید کا
سوچتا ہوں سوچنا بھی آدمی کا جرم ہے
ہر یقیں طالب ہے میرے فکر کی تحدید کا
راستہ تعمیر ملت کا نکل آئے گا کچھ
وا ہو دروازہ گر استفہام کا تنقید کا
زیر ہو جائے زبردستی کا لشکر ایک دن
ہو سبق تشدید کا حصہ فقط تجوید کا
جبر کی بستی میں بھی رائے کی آزادی ملے
سب کو استحقاق ہو تائید کا تردید کا
ہو گئی فرسودہ واعظ آپ کی یہ داستاں
آ گیا ہے وقت اب افکار کی تجدید کا
گفتگو کے فن سے ہیں نا آشنا کیوں لوگ سب
ہر کوئی مشتاق اپنی سوچ کی تائید کا
سوچ پر پہرے ہدایتؔ ہوں تو کیا ہو ارتقا
مجتہد بھی بن گیا ہے خوشہ چیں تقلید کا