ہیما کنڈپال ہیا کی غزلیں — Hema Kandpal Hiya Ghazals

ہیما کنڈپال ہیا کی منتخب غزلیں اور نظمیں۔

سرسوں کے کھیتوں میں اپنے کاغذ دھانی کرتے کرتے (غزل)

سرسوں کے کھیتوں میں اپنے کاغذ دھانی کرتے کرتے

غزلیں ساری لکھی ہم نے خوں کو پانی کرتے کرتے

مجبوری کے چاول بھونے لاچاری دو مٹھی ڈالی

ہم نے کھایا غم کو اپنے پھر گڑ دھانی کرتے کرتے

اس دنیا میں جو بھی بھایا اس کو ہم نے خود سا سمجھا

اک عرصہ بیتا ہے ہم کو یہ نادانی کرتے کرتے

کیوں دریا بھر مصرع اولیٰ اس کی میت پر تھا رویا

جس شاعر کا دم نکلا تھا مصرع ثانی کرتے کرتے

پہلے ان سے دوری رکھی پھر خود ہی تھا اظہار کیا

ایسے دل نے چاہا ان کو آنا کانی کرتے کرتے

سب کے من کی کرتے کرتے جانے بیتی کتنی صدیاں

ہم کو تو جینا تھا یارو بس من مانی کرتے کرتے

غم کے موسم میں کیوں کر لی ہم نے ان غزلوں سے یاری

اب تو ساری عمر کٹے گی اشک بیانی کرتے کرتے

پرندوں کا شجر کو چھوڑ کر جانا ضروری تھا (غزل)

پرندوں کا شجر کو چھوڑ کر جانا ضروری تھا

کہ طائر کو خزاں کا خوف بھی کھانا ضروری تھا

کہانی میں سناتی روز اک اس کو رہائی کی

قفس میں قید دل کو خواب دکھلانا ضروری تھا

جو ہوتی عطر میں تو بس ہی جاتی جسم میں تیرے

میں تھی تلسی مرا آنگن کو مہکانا ضروری تھا

ہزاروں حسرتیں ہیں خواہشیں ہیں قید جب دل میں

مجھے پا کر ترا ان کو بھی تو پانا ضروری تھا

کیا بوتل میں دل کو قید پھر پھینکا سمندر میں

مرے سینہ سے دل کا دور ہو جانا ضروری تھا

بتا کر دودھ جب پانی دیا تھا ساتھ روٹی کے

یوں ماں کا رات پھر بچوں کو بہلانا ضروری تھا

اذیت رات کھانے میں پروسی مفلسی کے ساتھ

ہیاؔ کا حوصلہ پھر ساتھ میں کھانا ضروری تھا

سنو بات اک روز کی میں بتاؤں (نظم)

سنو بات اک روز کی میں بتاؤں

کہانی تمہیں آج اس کی سناؤں

مرے سامنے جو کسی سے نہ لڑتا

وہی ایک لڑکا جو مجھ پہ تھا مرتا

زمیں پہ جسے تھا فلک سے اتارا

شکر لب وہ گل تھا فروزاں ستارا

جسے دیکھ بادل نے کی چشم پر نم

فضا میں تھی رنگینیاں اور سرگم

تھی سیپی سی آنکھیں گلابی سا چہرہ

کہ جیسے ندی میں کہیں چاند ٹھہرا

غزل وہ تھا کہتا مری شوخیوں پہ

مجھے تھا چڑھاتا میری غلطیوں پہ

سیانا بہت اور تھوڑا سا ناداں

انا جیسے پروت تھی مسکان میداں

ہتھیلی پہ میری جو سو بار سویا

مرے سامنے تھا سسک کر وہ رویا

یہی بات مجھ سے وہ کہتا تھا اکثر

پری اپسرا یا ہو تم حور پیکر

پرستش ہو میری تمہیں شاعری ہو

محبت صنم تم مری آخری ہو

وہ چپکے سے مجھ کو یوں پیغام دیتا

ہتھیلی کی لرزش کو تھا تھام لیتا

اشاروں میں کہتا تھا جو بات دل کی

کہانی ہے یہ اس دل مشتعل کی

انا بھی تھی روئی تھا رویا اندھیرا

خبر اس کے جانے کی لایا سویرا

تھا طوفان آیا گھٹا میلی چھائی

کبھی بات دل کی میں کہہ پھر نہ پائی

سزا چاہتی ہوں خطا کار ہوں میں

مقدر نہیں پر ترا پیار ہوں میں

پرستش نہیں میں نہ ہی شاعری ہوں

محبت میں لیکن تری آخری ہوں