حنیف اخگر کی منتخب غزلیں اور نظمیں۔
عزم سفر سے پہلے بھی اور ختم سفر سے آگے بھی (غزل)
عزم سفر سے پہلے بھی اور ختم سفر سے آگے بھی
راہ گزر ہی راہ گزر ہے راہ گزر سے آگے بھی
تاب نظر تو شرط ہے لیکن حد نظر کیوں حائل ہے
جلوہ فگن تو جلوہ فگن ہے حد نظر سے آگے بھی
صبح ازل سے شام ابد تک میرے ہی دم سے رونق ہے
اس منظر سے اس منظر تک اس منظر سے آگے بھی
وہم و گماں سے علم و یقیں تک سیکڑوں نازک موڑ آئے
روئے زمیں سے شمس و قمر تک شمس و قمر سے آگے بھی
دل سے دعا نکلے تو یقیناً باب اثر تک پہنچے گی
آہ جو نکلے دل سے تو پہنچے باب اثر سے آگے بھی
دیدۂ تر کا اب تو اخگرؔ ایک ہی عالم رہتا ہے
نالۂ شب سے آہ سحر تک آہ سحر سے آگے بھی
شکستہ دل کسی کا ہو ہم اپنا دل سمجھتے ہیں (غزل)
شکستہ دل کسی کا ہو ہم اپنا دل سمجھتے ہیں
ترے غم میں زمانے بھر کے غم شامل سمجھتے ہیں
ہوئی ہیں اس قدر آسانیوں سے مشکلیں پیدا
ہر آسانی کو ہم اپنی جگہ مشکل سمجھتے ہیں
وہ خود دیکھے مگر اس کو کوئی نہ دیکھنے پائے
ترا انداز ہم اے پردۂ حائل سمجھتے ہیں
کسی کا ہاتھ زخموں پر کسی کا ہاتھ گردن میں
مسیحا کون ہے اور کون ہے قاتل سمجھتے ہیں
حد دل سے تو باہر درد تیرا ہو نہیں سکتا
جہاں تک درد ہے تیرا وہاں تک دل سمجھتے ہیں
مجال دید کی مہلت نہ دیں لیکن یہ کیا کم ہے
وہ ہم کو اپنی بزم ناز کے قابل سمجھتے ہیں
تعین حسن مقصد کا نہیں اس کے سوا کوئی
ٹھہر جائیں جہاں ہم بس اسے منزل سمجھتے ہیں
کہاں تک ہم مسلسل رخ بدلتے جائیں کشتی کا
وہی طوفاں نکلتا ہے جسے ساحل سمجھتے ہیں
انہیں فرصت کہاں یہ بھی غنیمت جانئے اخگرؔ
کہ وہ دل کو کسی تعزیر کے قابل سمجھتے ہیں