حامد اقبال صدیقی کی غزلیں — Hamid Iqbal Siddiqui Ghazals

حامد اقبال صدیقی کی منتخب غزلیں اور نظمیں۔

ذرا سی بات ہو کیا کیا سوال کرتا ہے (غزل)

ذرا سی بات ہو کیا کیا سوال کرتا ہے

مرا ہنر مجھے اکثر نڈھال کرتا ہے

وہ چاٹ لیتا ہے دیمک کی طرح مستقبل

تمہیں پتہ نہیں ماضی جو حال کرتا ہے

مرے وجود کو صدیوں کا سلسلہ دے کر

وہ کون ہے جو مجھے لا زوال کرتا ہے

بڑے قریب سے ہو کر گزر گئی دنیا

ملا نہ اس سے مرا دل کمال کرتا ہے

میں چاہتا ہوں مراسم بس ایک سمت چلیں

مگر وہ خود ہی جنوب و شمال کرتا ہے

دعا کا در تو سبھی کے لئے کھلا ہے مگر

جسے یقین ہو اس پر سوال کرتا ہے

منزل کہاں ہے دور تلک راستے ہیں یار (غزل)

منزل کہاں ہے دور تلک راستے ہیں یار

کس جستجو میں خواب کے یہ قافلے ہیں یار

پل پل بدلتا رہتا ہے تہذیب کا مزاج

لمحوں کی دسترس میں عجب سلسلے ہیں یار

ہے سابقہ ہزار مراحل سے اور پھر

اس زندگی کے بعد بھی کچھ مرحلے ہیں یار

تو ہی بتا تجھے میں رکھوں کس شمار میں

اچھے‌‌برے سبھی سے مرے رابطے ہیں یار

ہاں تجھ سے بے وفائی کی امید تو نہیں

پر سچ کہوں تو دل میں کئی واہمے ہیں یار

خواہش کا احترام ہے جذبوں کی آنچ بھی

نیندوں کا اہتمام ہے اور رت جگے ہیں یار

نظمیں کہاں ہیں فلسفے منظوم ہیں تمام

غزلیں کہاں ہیں عشق کے سب مرثیے ہیں یار

احباب رشتے دار سبھی ممبئی میں ہیں

لیکن دلوں کے بیچ بڑے فاصلے ہیں یار

کیوں آخر مجھے شیطان کہتے ہیں (نظم)

کیوں آخر مجھے شیطان کہتے ہیں

یہ سارے لوگ

اگر گنجا کوئی ہو سامنے چندیا چمکتی ہو

تو کیا یہ دل نہیں کہتا

چپت اک آدھ جڑنے کو

ہتھیلی جب کھجاتی ہے

میں ایسا کر گزرتا ہوں

مری بلڈنگ کا چوکیدار

سو جاتا ہے دن میں بھی

وہ خراٹے بھی لیتا ہے

جو اس کی ناک پر

اک ٹیپ چپکانے کو جی چاہے

پڑوسن آنٹی کی

مرغیاں انڈے جو دیتی ہیں

میں اکثر سوچتا ہوں

ان سے چوزے کیوں نکلتے ہیں

مری خواہش یہ ہوتی ہے

انہیں میں توڑ کر دیکھوں

گلی کے موڑ پہ

بیٹھا ہوا موٹا سا اک کتا

اگر دوڑے تو کیسا ہو

اگر بھونکے تو کیسا ہو

پٹاخہ اس کی دم پر باندھ کر

ماچس دکھانے کو

مرا جی چاہتا ہے گر

بزرگو مجھ کو بتلاؤ

یہ سب کرنے کو آخر کیا

کسی کا دل نہیں کہتا

کیا میں سب سے انوکھا ہوں

یہ سب شیطان کرتے ہیں

کوئی انساں نہیں کرتا

کیوں آخر

مجھے شیطان کہتے ہیں