حمید سہروردی کی منتخب غزلیں اور نظمیں۔
نہیں (نظم)
نہیں
اب مجھے صدا نہ دو
کہ شام ڈھلنے لگی ہے
ابھی کچھ دیر میں سبھی راستے گم ہو جائیں گے
مجھ میں وہی شخص بولے گا
شام سے میں بجھا بجھا سا رہتا ہوں
تمہیں کیا کہوں
تم کسی حسین خواب کے پروں پر سوار
بے نام سمتوں میں
خود کو پانے کے لیے چلے جاؤ گے
میں اکیلا ہی سہی
اور سنو
کسی بے نام سمت میں
کوئی ملے تو اتنا ہی کہو
کہ میں صدیوں سے آب حیات کے ایک جرعے کی برش
حلقوم میں اتارے تمہارا منتظر ہوں
اور یہ بھی سنو
کہیں راستے میں
رات مل جائے تو اس سے کہو
کہ میں اندھیرا نہیں ہوں
میں برسہا برس سے
چاندنی کو پانے کے لیے
دھوپ کی باگ کو تھامے ہوئے
کانچ کے ٹکڑوں کا سفوف چبانے لگا ہوں
جب میرے سارے حواس
فضاؤں میں تحلیل ہو جائیں
تو تم میرے جسم میں
بس ایک ہی بار صور پھونکو
اور پھر
تم مجھ سے کہو کہ اب بھی تم خدا نہیں ہو