دلشاد نسیم کی غزلیں — Dilshad Naseem Ghazals

دلشاد نسیم کی منتخب غزلیں اور نظمیں۔

آپ جب بھی کبھی مسکرانے لگے (غزل)

آپ جب بھی کبھی مسکرانے لگے

درد جتنے تھے میرے سہانے لگے

رات پوری کھڑی ہے ابھی صحن میں

تارے مجھ کو ابھی سے جگانے لگے

خواب جلتے ہوئے رکھ دیے راہ پر

بے سہارا تھے وہ سب ٹھکانے لگے

اس قدر جان کو ہو رہا تھا ملال

آپ روٹھے نہیں ہم منانے لگے

اب کے شاید وہ آئے گا اس شہر میں

بام پر ہم دئے تو جلانے لگے

بہہ گیا آنکھ سے میرا کاجل تو پھر

رنج و غم دل کے سب ہی چھپانے لگے

اس قدر مہرباں وہ کہاں مجھ پہ تھے

جس قدر وہ مجھے اب جتانے لگے

عشق کا بھی قبیل ہوتا ہے (غزل)

عشق کا بھی قبیل ہوتا ہے

درد دل کا کفیل ہوتا ہے

یاد آیا نہ کر نمازوں میں

میرا سجدہ طویل ہوتا ہے

بے وفاؤں کے ذکر میں تیرا

تذکرہ بر سبیل ہوتا ہے

عرصۂ زیست تم ذرا سوچو

ہائے کتنا طویل ہوتا ہے

اے شب غم ہر ایک پل تیرا

مجھ کو صدیاں مثیل ہوتا ہے

اشک جو عشق نے بہایا وہ

عاشقوں کا وکیل ہوتا ہے

تنہا بے چارہ سا یہ میرا دل

تیرے بن اب علیل ہوتا ہے

موسم بہت سرد ہے ان دنوں (نظم)

موسم بہت سرد ہے ان دنوں

تمہارے شہر میں تو برف بھی پڑ رہی ہوگی

اور شانوں پہ تمہارے گر رہی ہوگی

چاہتی ہوں ..،

سیاہ کوٹ پہ گرے سفید برف کے ذروں کو

چنوں اس طرح کہ جیسے

مری انگلیاں اپنی پوروں سے تمہارا درد چنتی ہیں

سوچتی ہوں …،

گھر سے تم جب بھی نکلو اپنے آنچل کا سائباں کر دوں

کہ ذرا بھی کوئی برف کا تمہارے بالوں کی الجھنوں کو

چھو سکے نہ پا سکے

پاؤں رکھو تم جہاں پر

ہتھیلیوں کو فرش کر دوں

تمہیں سرد دنوں سے شکایت نہ ہو

سو اپنی محبت کی حدتوں سے

تمہارے دنوں کو گرم کر دوں

نازک مزاج ہو تم

سرد موسم راس نہیں ہے تم کو

نازک مزاجیوں کا خیال رکھنا

اپنا خیال رکھنا

کہ موسم بہت سرد ہے ان دنوں

اور تمہارے شہر میں تو برف بھی پڑ رہی ہوگی