دانیال طریر کی غزلیں — Daniyal Tareer Ghazals

دانیال طریر کی منتخب غزلیں اور نظمیں۔

ایک بجھاؤ ایک جلاؤ خواب کا کیا ہے (غزل)

ایک بجھاؤ ایک جلاؤ خواب کا کیا ہے

آنکھوں میں رکھ کر سو جاؤ خواب کا کیا ہے

پاؤں تلے ہے روند کے گزرو کچل کے دیکھو

پیچھے جاؤ آگے آؤ خواب کا کیا ہے

شیلف پہ الٹا کر کے رکھ دو اور بسرا دو

گل دانوں میں پھول سجاؤ خواب کا کیا ہے

خواب کا کیا ہے رات کے نقش و نگار بناؤ

رات کے نقش و نگار بناؤ خواب کا کیا ہے

نیند ملی ہے گڑ سے میٹھی شہد سے شیریں

گاؤ ناچو ناچو گاؤ خواب کا کیا ہے

لا یعنی ہے سب لا یعنی یعنی یعنی

اور کہانی لکھ کر لاؤ خواب کا کیا ہے

ایک کباڑی گلیوں گلیوں واج لگائے

راکھ خریدو آگ کے بھاؤ خواب کا کیا ہے

اجالا ہی اجالا روشنی ہی روشنی ہے (غزل)

اجالا ہی اجالا روشنی ہی روشنی ہے

اندھیرے میں جو تیری آنکھ مجھ کو دیکھتی ہے

ابھی جاگا ہوا ہوں میں کہ تھک کر سو چکا ہوں

دئیے کی لو سے کوئی آنکھ مجھ کو دیکھتی ہے

تجسس ہر افق پر ڈھونڈھتا رہتا ہے اس کو

کہاں سے اور کیسی آنکھ مجھ کو دیکھتی ہے

عمل کے وقت یہ احساس رہتا ہے ہمیشہ

مرے اندر سے اپنی آنکھ مجھ کو دیکھتی ہے

میں جب بھی راستے میں اپنے پیچھے دیکھتا ہوں

وہی اشکوں میں بھیگی آنکھ مجھ کو دیکھتی ہے

کہیں سے ہاتھ بڑھتے ہیں مرے چہرے کی جانب

کہیں سے سرخ ہوتی آنکھ مجھ کو دیکھتی ہے

درختو مجھ کو اپنے سبز پتوں میں چھپا لو

فلک سے ایک جلتی آنکھ مجھ کو دیکھتی ہے

ہمارے غم جدا تھے (نظم)

ہمارے غم جدا تھے

قریۂ دل کی فضا آب و ہوا

موسم جدا تھے

شام تیرے جسم کی دیوار سے چمٹی ہوئی تھی

مجھ کو کالی رات کھاتی تھی

تجھے آواز دیتی تھی ترے اندر سے اٹھتی ہوک

مجھ کو بھوک میری روح سے باہر بلاتی تھی

تجھے پاؤں میں پڑتی بیڑیوں کا روگ لاحق تھا

مجھے آزادی پہ شک تھا

تجھے اپنوں نے اپنے گھیر کا قیدی بنایا تھا

مجھے بے رشتگی نے ذات کا بھیدی بنایا تھا

مسلسل لیکھ پر گردش میں رہنا ناچنا

تیرا وطیرہ تھا

مری اک اپنی دنیا تھی

مرا اپنا جزیرہ تھا

کوئی دریا تھا اپنے بیچ

ہم دونوں کنارے تھے

الگ دو کہکشائیں تھیں

جہاں کے ہم ستارے تھے