دامودر ٹھاکر ذکی کی غزلیں — Damodar Thakur Zaki Ghazals

دامودر ٹھاکر ذکی کی منتخب غزلیں اور نظمیں۔

ان کے ملنے کا بظاہر تو یقیں کوئی نہیں (غزل)

ان کے ملنے کا بظاہر تو یقیں کوئی نہیں

وہ اگر چاہیں کوئی شک ہے نہیں کوئی نہیں

اے جنوں تیری عنایت سے ہے تنہائی نصیب

اور تو سارے بیاباں میں کہیں کوئی نہیں

مطمئن جب تھے تو ہمت کا تھا ساتھ اپنے ہجوم

ڈر جہاں ہونے لگا ہم کو وہیں کوئی نہیں

عشق کی راہوں میں آیا ہے اک ایسا بھی مقام

صرف اک میں ہوں وہاں اہل زمیں کوئی نہیں

ایک دن نقش قدم پر مرے بن جائے گی راہ

آج صحرا میں تو تنہا ہوں کہیں کوئی نہیں

نقش قدم ملے جو ترے چل کے سر سے ہم (غزل)

نقش قدم ملے جو ترے چل کے سر سے ہم

اکثر گزر گئے ہیں تری رہ گزر سے ہم

ہیں بے نیاز تندہیٔ چارہ گر سے ہم

بے خود رہے عنایت درد جگر سے ہم

سمجھے جہاں کو اپنا بڑے کر و فر سے ہم

دیکھے گئے ہمیشہ پرائی نظر سے ہم

نقش قدم سے چمٹے تری رہ گزر سے ہم

پر تیری دید کو رہے ترسے کے ترسے ہم

ہم دیکھتے ہیں تم کو ہماری نگاہ سے

غیروں کو دیکھتے ہیں تمہاری نظر سے ہم

محفوظ کر لے اپنے لئے غم گساریاں

صیاد با خبر ہیں ترے خیر و شر سے ہم

تم کو سمجھ کے تم ستم اپنے پہ ڈھا لئے

کس درجے بے خبر ہیں ہماری خبر سے ہم

اللہ شیخ جی کو تو جنت کرے نصیب

وابستہ صبح و شام رہیں ان کے در سے ہم

لاتے نہ تیرے عشق میں شکوے زبان پر

آپ اپنے کو سمجھتے اگر پیشتر سے ہم

ہم تیرے ہو کے بزم میں تیری نہ رہ سکے

محفل تھی تیری آنکھ سی تیری نظر سے ہم

یا پار ہوں گے چیر کے یا ڈوب جائیں گے

ساحل پہ رک نہ جائیں گے طوفاں کے ڈر سے ہم

نکلی ہوئی دعائیں ابھی جستجو میں ہیں

شاید بعید تر ہیں مقام اثر سے ہم

نظروں سے سب کی گر گئے پروا نہ تھی ہمیں

لیکن غضب ہے گرتے ہیں اپنی نظر سے ہم

کیا حشر ہونے والا ہے دیکھیں گے اے ذکیؔ

بیٹھے ہیں دل لگا کے کسی فتنہ گر سے ہم